റാന്നി : മലങ്കര സഭയുടെ സ്വാതന്ത്ര്യത്തിന്റെയും ഭാരത സഭയുടെ ദേശീയതയുടെയും പ്രതീകമാണ് കാതോലിക്കേറ്റ് പതാകയും കാതോലിക്കാദിനാഘോഷവും എന്ന് ഡോ. ജോഷ്വാ മാര്‍ നിക്കോദീമോസ് മെത്രാപ്പോലീത്താ. മലങ്കര ഓര്‍ത്തഡോക്‌സ് സുറിയാനി സഭയുടെ നിലയ്ക്കല്‍ ഭദ്രാസനത്തിലെ പ്രാര്‍ത്ഥനായോഗത്തിന്റെയും സുവിശേഷസംഘത്തിന്റെയും സംയുക്ത വാര്‍ഷികവും സഭാദിനാഘോഷവും റാന്നി മാര്‍ ഗ്രീഗോറിയോസ് കാതോലിക്കേറ്റ് സെന്റര്‍ ചാപ്പലില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
മലങ്കര സഭാ വൈദിക ട്രസ്റ്റി ഫാ.ഡോ.എം.ഒ.ജോണ്‍ സഭാദിന സന്ദേശം നല്‍കി. സഭയുടെ അത്മായ ട്രസ്റ്റിയായി 10 വര്‍ഷം സ്തുത്യര്‍ഹമായി സേവനം അനുഷ്ഠിക്കുകയും നിലയ്ക്കല്‍ ഭദ്രാസനത്തിന്റെ വളര്‍ച്ചയില്‍ ശക്തമായ പിന്തുണ നല്‍കുകയും ചെയ്തിരുന്ന മുത്തൂറ്റ് ശ്രീ.എം.ജി. ജോര്‍ജ്ജിന്റെ നിര്യാണത്തില്‍ യോഗം അനുശോചിച്ചു. ഫാ.ഷൈജു കുര്യന്‍, ഫാ.വറുഗീസ് ഫിലിപ്പ്, ഫാ.ജോണ്‍ സാമുവേല്‍, ഡോ.റോബിന്‍ പി.മാത്യു, എ.വി.ജോസ്, കെ.സി.മാത്യു എന്നിവര്‍ പ്രസംഗിച്ചു.