കൊല്ലം : മലങ്കര ഓർത്തഡോക്സ് സുറിയാനി സഭയുടെ പൗരാണിക ഭദ്രാസനങ്ങളിലൊന്നായ കൊല്ലം ഭദ്രാസനത്തിന്റെ 150 ആം വാർഷിക ആഘോഷങ്ങൾക്ക് 2025 ജനുവരി 30ന് തുടക്കമാകും. കൊല്ലം അരമനയുടെ 70ആം വാർഷികവും, അരമന കത്തീഡ്രലിന്റെ 50ആം വാർഷികവും, ഭദ്രാസനാധിപൻ ഡോ.ജോസഫ് മാർ ദിവന്നാസിയോസിന്റെ 70ആം പിറന്നാൾ ആഘോഷവും ഇതോടൊപ്പം നടക്കും.
പരിശുദ്ധ മാർത്തോമാശ്ലീഹായുടെ പാദസ്പർശം കൊണ്ട് അനുഗ്രഹീതമായ പട്ടണമാണ് കൊല്ലം. 1876ൽ മുളന്തുരുത്തി സുന്നഹദോസിലാണ് മലങ്കരസഭയുടെ കൊല്ലം ഭദ്രാസനം രൂപീകൃതമാകുന്നത്. കൊട്ടാരക്കര കോട്ടപ്പുറം സെമിനാരിയും, കുണ്ടറ സെമിനാരിയുമായിരുന്നു ഭദ്രാസനത്തിന്റെ ആദ്യകാല ആസ്ഥാനങ്ങൾ. മലങ്കര സഭയുടെ സൂര്യതേജസ് പരിശുദ്ധ ബസേലിയോസ് മാർത്തോമ്മാ മാത്യൂസ് ദ്വിതീയൻ കാതോലിക്കാ ബാവയാണ് ആധുനിക കൊല്ലം മെത്രാസനത്തിന്റെ ശില്പി. മാത്യുസ് മാർ കൂറിലോസ് മെത്രാപ്പോലീത്തയായിരിക്കെയാണ് കൊല്ലം പട്ടണത്തിന്റെ ഹൃദയഭാഗത്ത് ഒരേക്കർ സ്ഥലം വാങ്ങി അരമന സ്ഥാപിച്ചത്.1955 ജനുവരി 6ന് കുദാശ ചെയ്തു. ഭദ്രാസന ആസ്ഥാന ദേവാലയമായ സെന്റ് തോമസ് കത്തീഡ്രൽ പള്ളി കൂദാശ ചെയ്തത് 1976 ജനുവരി 30നാണ്. മാത്യൂസ് ദ്വിതീയൻ ബാവയുടെ
ജന്മദിനവും ജനുവരി 30ന് തന്നെയാണ്.
സുവർണജൂബിലി ആഘോഷങ്ങൾക്ക് തുടക്കം കുറിക്കുന്ന ജനുവരി 30ന് രാവിലെ 6.30 ന് പ്രഭാത നമസ്കാരത്തെ തുടർന്ന് വിശുദ്ധ കുർബ്ബാന.
കൊല്ലം ഭദ്രാസനാധിപൻ ഡോ. ജോസഫ് മാർ ദിവന്നാസിയോസ് മെത്രാപ്പോലീത്താ കാർമ്മികത്വം വഹിക്കും. വൈകിട്ട് 3.30ന് ശതോത്തര സുവർണ്ണ ജൂബിലി സ്മാരക മന്ദിരത്തിന്റെ ശിലാസ്ഥാപന കർമ്മം ഡോ.ജോസഫ് മാർ ദിവന്നാസിയോസ് മെത്രാപ്പോലീത്താ നിർവഹിക്കും. ശതോത്തര സുവർണ്ണജൂബിലി ആഘോഷങ്ങളുടെ ഉദ്ഘാടനം കൊട്ടാരക്കര പുനലൂർ ഭദ്രാസനാധിപൻ ഡോ. യൂഹാനോൻ മാർ
തേവോദോറോസ് മെത്രാപ്പോലീത്താ നിർവഹിക്കും. വൈദീക ട്രസ്റ്റി ഫാ. ഡോ. തോമസ് വർഗ്ഗീസ് അമയിൽ ഭദ്രാസന ചരിത്ര അവലോകനം നിർവഹിക്കും. ശതോത്തര സുവർണജൂബിലി ആഘോഷങ്ങളുടെ ലോഗോ കൊല്ലം മേയർ പ്രസന്ന ഏണസ്റ്റ് പ്രകാശനം ചെയ്യും. ചാരിറ്റി പദ്ധതികളുടെ പ്രഖ്യാപനം എം. നൗഷാദ് എം.എൽ.എയും, ഫണ്ട് സമാഹരണ ഉദ്ഘാടനം അസ്സോസിയേഷൻ സെക്രട്ടറി അഡ്വ. ബിജു ഉമ്മനും നിർവഹിക്കും.