കോട്ടയം : മലങ്കര ഓര്‍ത്തഡോക്‌സ് സുറിയാനി സഭയുടെ ആസ്ഥാനമായ ദേവലോകം കാതോലിക്കേറ്റ് അരമനയില്‍ സംയുക്ത ഓര്‍മപ്പെരുന്നാളിന് തുടക്കമായി. അരമന ചാപ്പലില്‍ കബറടങ്ങിയിരിക്കുന്ന പരിശുദ്ധ ബസേലിയോസ് ഗീവര്‍ഗീസ് ദ്വിതീയന്‍ കാതോലിക്കാ ബാവാ, പരിശുദ്ധ ബസേലിയോസ് ഔഗേന്‍ പ്രഥമന്‍ കാതോലിക്കാ ബാവാ, പരിശുദ്ധ ബസേലിയോസ് മാര്‍ത്തോമ്മാ മാത്യൂസ് പ്രഥമന്‍ കാതോലിക്കാ ബാവാ, പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവാ എന്നിവരുടെ ഓര്‍മ്മപ്പെരുന്നാളാണ് ആചരിക്കുന്നത്.
കണ്ടനാട് ഈസ്റ്റ് ഭദ്രാസനാധിപന്‍ ഡോ.തോമസ് മാര്‍ അത്തനാസിയോസ് മെത്രാപ്പോലീത്താ കൊടിയേറ്റ് നിര്‍വഹിച്ചു. 31ന് 7ന് ഫാ. ഇട്ടി തോമസ് കൂര്‍ബാന അര്‍പ്പിക്കും. 6.30ന് വൈദിക സെമിനാരി പ്രിന്‍സിപ്പല്‍ ഫാ. ഡോ.റജി മാത്യൂസ് പ്രസംഗിക്കും. ജനുവരി ഒന്നിന് 7ന് കുര്‍ബാനയ്ക്കു വൈദിക ട്രസ്റ്റി ഫാ. ഡോ. എം. ഒ. ജോണ്‍ കാര്‍മികത്വം വഹിക്കും. 6.30ന് സണ്‍ഡേ സ്‌കൂള്‍ ഡയറക്ടര്‍ ജനറല്‍ ഫാ. ഡോ. വര്‍ഗീസ് വര്‍ഗീസ് പ്രസംഗിക്കും.
2ന് രാവിലെ 7.30ന് ഫാ. ഡോ. ജോണ്‍സ് ഏബ്രഹാം കോനാട്ട് കുര്‍ബാന അര്‍പ്പിക്കും. തീര്‍ഥാടകര്‍ക്ക് മാര്‍ ഏലിയാ കത്തീഡ്രലിലും, കുഞ്ഞിക്കുഴിയിലും സ്വീകരണം നല്‍കും. 6ന്സന്ധ്യാനമസ്‌കാരത്തിന് ശേഷം അടൂര്‍- കടമ്പനാട് ഭദ്രാസനാധിപന്‍ ഡോ.സഖറിയാസ് മാര്‍ അപ്രേം മെത്രാപ്പോലീത്താ അനുസ്മരണ പ്രഭാഷണം നടത്തും. തുടര്‍ന്ന് ആശിര്‍വാദം, നേര്‍ച്ച ഭക്ഷണം.
പ്രധാന പെരുനാള്‍ ദിനമായ 3ന് 7.30ന് മുന്നിന്മേല്‍ കൂര്‍ബാന. പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവാ പ്രധാന കാര്‍മികത്വം വഹിക്കും. അനുസ്മരണ പ്രസംഗം, കബറിങ്കല്‍ ധുപപ്രാര്‍ഥന, പ്രദക്ഷിണം, നേര്‍ച്ച ഭക്ഷണം എന്നിവ നടക്കും. സഭയിലെ മെത്രാപ്പോലിത്തമാര്‍ പെരുന്നാള്‍ ചടങ്ങുകളില്‍ സഹകാര്‍മികരായിരിക്കും. കോവിഡ് മാനദണ്ഡം പാലിച്ചാണ് ശുശ്രൂഷകള്‍. ഓണ്‍ലൈനായി സംബന്ധിക്കാന്‍ സൗകര്യമുണ്ട്.
ഫാ. ഇട്ടി തോമസിന്റെ നേതൃത്വത്തില്‍ കമ്മിറ്റികള്‍ പ്രവര്‍ത്തനം തുടങ്ങിയെന്നു ദേവലോകം അരമന മാനേജര്‍ ഫാ.യാക്കോബ് തോമസ് അറിയിച്ചു.