കോട്ടയം: പരിശുദ്ധ ദൈവമാതാവിന്റെ തിരുശേഷിപ്പ് തീർഥാടന കേന്ദ്രമായ കോട്ടയം ചെറിയപള്ളി മഹാഇടവകയിൽ മാതാവിന്റെ വാങ്ങിപ്പ് പെരുനാളിനോട് അനുബന്ധിച്ചുള്ള പതിനഞ്ചു നോമ്പും ശൂനോയോ പെരുന്നാളും ഓഗസ്റ്റ് 1 മുതൽ 15 വരെ ആചരിക്കും.
ദിവസവും രാവിലെ 7.00 ന് പ്രഭാത നമസ്കാരം, 7.30 ന് മെത്രാപ്പോലീത്താമാരുടെയും വൈദികരുടെയും കർമികത്വത്തിൽ കുർബാന, 10.30 ന് ഗാനശുശ്രൂഷ, 11.00 ന് പ്രശസ്ത പ്രഭാഷകർ നയിക്കുന്ന ധ്യാനം/ക്ലാസ്, 12.30 ന് ഉച്ചനമസ്‌കാരവും തുടർന്ന് മധ്യസ്ഥ പ്രാർത്ഥനയും, വൈകിട്ട് 6.00 ന് സന്ധ്യാ നമസ്കാരം.
ഓരോ ദിവസവും പ്രത്യേക വിഷയങ്ങളെ ആസ്പദമാക്കി പ്രാര്‍ത്ഥനകൾ നടത്തും.
ഓഗസ്റ്റ് 1ന് ഡോ.ജോഷ്വാ മാർ നിക്കോദീമോസ്, 11ന് ഡോ. മാത്യൂസ് മാർ സേവേറിയോസ്, പെരുന്നാൾ ദിനമായ 15ന് ഡോ. ഗീവർഗീസ് മാർ യൂലിയോസ് എന്നീ മെത്രാപ്പോലീത്താമാർ വിശുദ്ധ കുർബാനയ്ക്കു മുഖ്യകാർമികത്വം വഹിക്കും.
ഓഗസ്റ്റ് 11 ന് കുർബാനയെ തുടർന്ന് പരിശുദ്ധ ദൈവമാതാവിന്റെ തിരുശേഷിപ്പ് പരസ്യവണക്കത്തിനായി പുറത്തെടുത്തു പ്രതിഷ്ഠിക്കും.
15 ന് സന്ധ്യാനമസ്കാരത്തോടെ തിരുശേഷിപ്പ് പരസ്യവണക്കം അവസാനിക്കും. പരിശുദ്ധ ദൈവമാതാവിന്റെ ഇടക്കെട്ടിന്റെ (സൂനോറോ) ഒരു ഭാഗം സ്ഥാപിക്കപ്പെട്ട മലങ്കരയിലെ ആദ്യ ദേവാലയമാണ് കോട്ടയം ചെറിയപള്ളി.
ഓർത്തഡോക്സ് സഭാ വൈദീക ട്രസ്റ്റി ഫാ. എം.ഒ. ജോൺ, ഫാ.ഡോ. ഒ. തോമസ്, ഫാ. ജേക്കബ് മഞ്ഞളി, ഫാ. ബോബി ജോസ് കട്ടിക്കാട്, ജസ്റ്റിസ് കുര്യൻ ജോസഫ്, പി.എച്ച്. കുര്യൻ ഐഎഎസ് (റിട്ട.), ഡോ. ടിജു തോമസ് ഐആർഎസ്, തുടങ്ങിയ പ്രഗത്ഭർ വിവിധ ദിവസങ്ങളിൽ ധ്യാനം/ക്ലാസ് നയിക്കും.
14 ന് സന്ധ്യാ നമസ്കാരത്തെ തുടർന്ന് കൈത്തിരി പ്രാർഥന, പ്രദക്ഷിണം, വാഴ്‌വ്. 15ന് കുർബാനയെ തുടർന്ന് പള്ളിക്കുചുറ്റും പ്രദക്ഷിണം, വാഴ്‌വ് എന്നിവയോടെ പെരുന്നാൾ സമാപിക്കും.
Kottayam Cheriapally Mahaedavaka യൂട്യൂബ് ചാനലിൽ തത്സമയം സംപ്രേക്ഷണം ചെയ്യും