Author: Catholicate_Admin

വെണ്ണിക്കുളം: മനുഷ്യൻ വായിച്ചു വളരേണ്ടതും എഴുതി തെളിയേണ്ടതും വിദ്യാഭ്യാസ കാലഘട്ടത്തിലാണെന്ന് കാതോലിക്കേറ്റ് ആൻഡ് എം.ഡി. സ്കൂൾസ് മാനേജർ ഡോ.​ഗബ്രിയേൽ മാർ ​ഗ്രീ​ഗോറിയോസ് മെത്രാപ്പോലീത്ത. പഠനകാലത്ത് ആർജ്ജിച്ചെടുക്കുന്ന അറിവാണ് ജീവിതത്തെ രൂപപ്പെടുത്തുന്നതെന്നും മെത്രാപ്പോലീത്താ കൂട്ടിച്ചേർത്തു. വെണ്ണിക്കുളം സെന്റ് ബഹനാൻസ് ഹയർ സെക്കൻഡറി സ്കൂളിൻ്റെ 109-ാം വാർഷികത്തിൽ സംസാരിക്കുകയായിരുന്നു മെത്രാപ്പോലീത്താ. കോട്ടയം മെഡിക്കൽ കോളജ് പ്രിൻസിപ്പൽ ഡോ. വർഗീസ് പുന്നൂസ് സമ്മേളനം ഉദ്ഘാടനം ചെയ്തു.

പ്രിൻസിപ്പൽ ഡോ. ജേക്കബ് മണ്ണുമൂട് , ഹെഡ്മിസ്ട്രസ് രജനി ജോയി,പിടിഎ പ്രസിഡന്റ് ഫാ. ദിനേശ് പാറക്കടവിൽ സെന്റ് ബഹനാൻസ് വലിയപള്ളി വികാരി ഫാ . വർഗീസ് ചാക്കോ വഞ്ചിപ്പാലം, ജില്ലാ പഞ്ചായത്ത് പ്രസിഡന്റ്, ജിജി മാത്യു, പൂർവ്വ വിദ്യാർത്ഥിയും പോലീസ് ഉദ്യോ​ഗസ്ഥനുമായ ഷാനവാസ് കെ എച്ച്, സജി മാമ്പറക്കുഴി, സ്കൂൾ ഗവേണിങ് ബോർഡ് അംഗം റിൻസി തോമസ് പഞ്ചായത്ത് അം​ഗം മിനി സഖറിയ, മനോജ് പി ചെറിയാൻ, സ്റ്റാഫ് സെക്രട്ടറി ജസ്റ്റിൻ വർഗ്ഗീസ്, വിദ്യാർത്ഥി പ്രതിനിധി ജിനി, ജനറൽ കൺവീനർ ജേക്കബ് തോമസ് എന്നിവർ ആശംസകൾ അറിയിച്ചു. നീണ്ട വർഷത്തെ സേവനത്തിന് ശേഷം വിരമിക്കുന്ന അദ്ധ്യാപിക മിനി സഖറിയയുടെ ഫോട്ടോ മെത്രാപ്പോലീത്താ അനാച്ഛാദനം ചെയ്തു. സംസ്ഥാന സ്ക്കൂൾ കലോത്സവം, പ്രവർത്തി പരിചയമേള , സാമൂഹ്യശാസ്ത്രമേള, ഐടി മേള, കായികമേള എന്നിവയിൽ എ ഗ്രേഡ് നേടിയവർക്കുള്ള പുരസ്ക്കാരങ്ങളും വിതരണം ചെയ്തു.

കടമറ്റം : ചരിത്രത്തിന്റെ മങ്ങിയ താളുകൾക്ക് വീണ്ടും നിറം പിടിക്കുകയാണ്. കേരളത്തിലെ അതിപുരാതന ദൈവാലയങ്ങളിലൊന്നായ കടമറ്റംപള്ളി പൗരാണികതക്ക് കോട്ടം തട്ടാതെ നവീകരിക്കപ്പെടുകയാണ്. കാലം മായ്ക്കാത്ത പൗരാണിക ചിത്രങ്ങൾക്ക് പ്രകൃതദത്ത നിറക്കൂട്ടുകളിലൂടെ വീണ്ടും ജീവൻവെക്കുന്നു.വിവിധസംസ്ഥാനങ്ങളിൽ നിന്ന് എത്തിച്ച വിഭവങ്ങൾ ഉപയോ​ഗിച്ചാണ് നിറക്കൂട്ടുകൾ സൃഷ്ടിച്ചെടുത്തത്. മ്യൂറൽ പെയിന്റിങ് വി​ദ​ഗ്ധനായ ജിജുലാലിന്റെ നേതൃത്വത്തിലാണ് ഈ ജോലികൾ പൂർത്തീകരിച്ചത്.പഴയചിത്രങ്ങൾക്ക് നിറം പിടിപ്പിക്കാൻ അഞ്ച് മാസത്തോളം സമയമെടുത്തു.

പള്ളിയുടെ മച്ച് പൂർണമായും തേക്കിലാണ് നിർമ്മിച്ചിരിക്കുന്നത്. ഇതിനായി 1500 ക്യൂബിക് അടി തടി വേണ്ടിവന്നു. ഈ രം​ഗത്തെ വി​ദ​ഗ്ധനായ മണി ആശാരിയാണ് ജോലികൾക്ക് നേതൃത്വം നൽകിയത്.36അടി നീളവും ഒരടി വീതിയുമുള്ള 10 ശീലാന്തികൾ മേൽക്കൂരയിലുണ്ട്.ക്രെയിനും, ഖലാസികളും പരിശ്രമിച്ചാണ് ഇവ സ്ഥാപിച്ചത്.

പള്ളിക്കുള്ളിലെ കബറിടങ്ങളും, പൗരാണികത്വം വിളിച്ചോതുന്ന പേർഷ്യൻ കൽക്കുരിശും, പോയേടം കിണറുമൊക്കെ സംരക്ഷിച്ച് നിർത്തുന്ന വലിയ ഉദ്യമമാണ് പൂർത്തിയാകുന്നതെന്ന് വികാരി ഫാ.സണ്ണി വർ​ഗീസ് പറഞ്ഞു. കൊച്ചി അന്താരാഷ്ട്ര വിമാനത്താവളത്തിൽ നിന്ന് ( സിയാൽ ) വിരമിച്ച എഞ്ചിനീയറായ കെ. പി തങ്കച്ചനാണ് നിർമ്മാണ കമ്മിറ്റി കൺവീനർ. സഹ വികാരി ഫാ.എൽദോ മത്തായി, ട്രസ്റ്റിമാരായ കുര്യൻ പൗലോസ്, സോജൻ വർ​ഗീസ് മറ്റത്തിൽ, സെക്രട്ടറി ജോയി ജോസഫ് മാനേജിങ് കമ്മിറ്റി അംഗങ്ങൾ തുടങ്ങിയവരുടെ നേ നിർമ്മാണ പ്രവർത്തനങ്ങൾ നടന്നുവരുന്നത്.

2025 ഫെബ്രുവരിയിൽ മലങ്കരസഭയുടെ പരമാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാബാവായുടെ മുഖ്യകാർമ്മികത്വത്തിൽ നവീകരിച്ച പള്ളിയുടെ കൂദാശ നടക്കും. കണ്ടനാട് ഈസ്റ്റ് ഭ​ദ്രാസനാധിപൻ ഡോ തോമസ് മാർ അത്താനാസിയോസ്, അങ്കമാലി ഭ​ദ്രാസനാധിപൻ ഡോ. യൂഹാനോൻ മാർ പോളിക്കാർപ്പോസ്, ഇടുക്കി ഭ​ദ്രാസനാധിപൻ സഖറിയ മാർ സേവേറിയോസ് എന്നീ മെത്രാപ്പോലീത്താമാർ സഹകാർമ്മികത്വം വഹിക്കും. ഫെബ്രുവരി 5,6,7 തീയതികളിൽ നടക്കുന്ന പ്രധാനപെരുന്നാളിനോട് അനുബന്ധിച്ചാണ് കൂദാശ.