നാലാം മാര്‍ത്തോമ്മായുടെ ഓര്‍മ്മപ്പെരുന്നാള്‍

കണ്ടനാട്:  മലങ്കര മെത്രാപ്പോലീത്തായായിരുന്ന മാര്‍ത്തോമ്മാ നാലാമന്റെ  293മത് ഓര്‍മ്മപ്പെരുന്നാളും പരിശുദ്ധ ദൈവമാതാവിന്റെ വചനിപ്പ് പെരുന്നാളും സംയുക്തമായി 24, 25 തീയതികളില്‍ കണ്ടനാട് സെന്റ് മേരീസ് കത്തീഡ്രലില്‍  ആചരിക്കും. കണ്ടനാട് വെസ്റ്റ്ഭദ്രാസനാധിപന്‍ അഭിവന്ദ്യ ഡോ. മാത്യൂസ് മാർ സേവേറിയോസ് മെത്രാപ്പോലീത്താ മുഖ്യ കാര്‍മികത്വം വഹിക്കും. കോവിഡ് മാനദണ്ഡങ്ങൾ പാലിച്ചുകൊണ്ടാണ് പെരുന്നാള്‍ നടത്തപ്പെടുക. വികാരി റവ. ഐസക്ക് മട്ടമ്മേൽ കോർ എപ്പിസ്കോപ്പ പെരുന്നാൾ കൊടിയേറ്റ് നടത്തി.

24ന് വൈകിട്ട് 6.00 മണിയ്ക്ക് അഭി. ഡോ. മാത്യൂസ് മാർ സേവേറിയോസ് മെത്രാപ്പോലീത്തയുടെ മുഖ്യകാർമികത്വത്തിൽ സന്ധ്യാ നമസ്ക്കാരം. തുടർന്ന് നവീകരിച്ച വി.മദ്ബഹായുടെ കൂദാശ, അനുസ്മരണ പ്രസംഗം, കബറിങ്കൽ ധൂപപ്രാർത്ഥന, ആശീർവാദം.

25ന്  7.30ന് അഭി. ഡോ. മാത്യൂസ് മാർ സേവേറിയോസ് മെത്രാപ്പോലീത്തയുടെ പ്രധാന കാർമികത്വത്തിൽ വി.മൂന്നിന്മേൽ കുർബ്ബാന. തുടർന്ന് വി. ദൈവമാതാവിനോടുള്ള മദ്ധ്യസ്ഥ പ്രാർത്ഥന, കബറിങ്കൽ ധൂപപ്രാർത്ഥന, പള്ളിയ്ക്ക് ചുറ്റും പ്രദക്ഷിണം, ആശീർവാദം, നേർച്ച വിളമ്പ് എന്നിവ ഉണ്ടായിരിക്കുമെന്ന് വികാരി റവ. ഐസക്ക് മട്ടമ്മേൽ കോർ എപ്പിസ്കോപ്പ അറിയിച്ചു.

കാതോലിക്കേറ്റ് മലങ്കര സഭയുടെ സ്വാതന്ത്ര്യത്തിന്റെ പ്രതീകം -ഡോ.ജോഷ്വാ മാര്‍ നിക്കോദീമോസ് മെത്രാപ്പോലീത്താ

റാന്നി : മലങ്കര സഭയുടെ സ്വാതന്ത്ര്യത്തിന്റെയും ഭാരത സഭയുടെ ദേശീയതയുടെയും പ്രതീകമാണ് കാതോലിക്കേറ്റ് പതാകയും കാതോലിക്കാദിനാഘോഷവും എന്ന്  ഡോ. ജോഷ്വാ മാര്‍ നിക്കോദീമോസ് മെത്രാപ്പോലീത്താ. മലങ്കര ഓര്‍ത്തഡോക്‌സ് സുറിയാനി സഭയുടെ നിലയ്ക്കല്‍ ഭദ്രാസനത്തിലെ പ്രാര്‍ത്ഥനായോഗത്തിന്റെയും സുവിശേഷസംഘത്തിന്റെയും സംയുക്ത വാര്‍ഷികവും സഭാദിനാഘോഷവും റാന്നി മാര്‍ ഗ്രീഗോറിയോസ് കാതോലിക്കേറ്റ് സെന്റര്‍ ചാപ്പലില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

മലങ്കര സഭാ വൈദിക ട്രസ്റ്റി ഫാ.ഡോ.എം.ഒ.ജോണ്‍ സഭാദിന സന്ദേശം നല്‍കി. സഭയുടെ അത്മായ ട്രസ്റ്റിയായി 10 വര്‍ഷം സ്തുത്യര്‍ഹമായി സേവനം അനുഷ്ഠിക്കുകയും നിലയ്ക്കല്‍ ഭദ്രാസനത്തിന്റെ വളര്‍ച്ചയില്‍ ശക്തമായ പിന്തുണ നല്‍കുകയും ചെയ്തിരുന്ന മുത്തൂറ്റ് ശ്രീ.എം.ജി. ജോര്‍ജ്ജിന്റെ നിര്യാണത്തില്‍ യോഗം അനുശോചിച്ചു. ഫാ.ഷൈജു കുര്യന്‍, ഫാ.വറുഗീസ് ഫിലിപ്പ്, ഫാ.ജോണ്‍ സാമുവേല്‍, ഡോ.റോബിന്‍ പി.മാത്യു, എ.വി.ജോസ്, കെ.സി.മാത്യു എന്നിവര്‍ പ്രസംഗിച്ചു.

പാമ്പാടി പെരുന്നാള്‍ കൊടിയേറി

പാമ്പാടി: പരിശുദ്ധ പാമ്പാടി തിരുമേനിയുടെ 56-ാം ഓര്‍മ്മപ്പെരുന്നാളിന് പാമ്പാടി ദയറായില്‍ കൊടിയേറി. അഭി. ഡോ. യൂഹാനോന്‍ മാര്‍ ദീയസ്‌കോറോസ് മെത്രാപ്പോലീത്താ കാര്‍മികത്വം വഹിച്ചു. ഏപ്രില്‍ 4നും 5നുമാണ് പ്രധാന പെരുന്നാള്‍. പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവായും മറ്റു മെത്രാപ്പോലീത്തമാരും പെരുന്നാള്‍ ചടങ്ങുകള്‍ക്ക് കാര്‍മികത്വം വഹിക്കും.

4ന് 6.30ന് പാമ്പാടി സെന്റ് ജോണ്‍സ് കത്തിഡ്രലില്‍ നിന്നും വാഹനങ്ങളില്‍ ദയറായിലേക്ക്
റാസ. ദയറായില്‍ നടത്തുന്ന സന്ധ്യാനമസ്‌ക്കാരത്തിനു പരിശുദ്ധ കാതോലിക്കാ ബാവ മുഖ്യ കാര്‍മികത്വം വഹിക്കും. തുടര്‍ന്ന് അനുസ്മരണ പ്രസംഗം. 5ന് പുലര്‍ച്ചെ 5 മണിക്ക് അഭി. ഡോ. യൂഹാനോന്‍ മാര്‍ ദീയസ്‌കോറോസ് മെത്രാപ്പോലീത്തയുടെ കാര്‍മികത്വത്തില്‍ വിശുദ്ധ കുര്‍ബ്ബാന. 8 മണിക്ക് പരിശുദ്ധ കാതോലിക്കാ ബാവായുടെ പ്രധാന കാര്‍മികത്വത്തില്‍ വിശുദ്ധ മൂന്നിന്മേല്‍ കുര്‍ബ്ബാന. തുടര്‍ന്ന പ്രസംഗം, പ്രദിക്ഷിണം, ശൈഹ്ലീക വാഴ്‌വ്.

കോവിഡ് നിയന്ത്രണങ്ങള്‍ പാലിച്ച് വിശ്വാസികള്‍ക്കു പെരുന്നാള്‍ ചടങ്ങില്‍ പങ്കെടുക്കാന്‍ ക്രമീകരണമുണ്ട്. പെരുന്നാള്‍ ശുശ്രൂഷകളുടെ തത്സമയ സംപ്രേക്ഷണം ദയറായുടെ ഫേസ്ബുക്ക് പേജിലും യൂട്യൂബിലും ഉണ്ടായിരിക്കും.

കാതോലിക്കേറ്റ് ദിനാഘോഷം

കോട്ടയം/പരുമല : കാതോലിക്കേറ്റ് ദിനത്തില്‍ മലങ്കര ഓര്‍ത്തഡോക്‌സ് സഭയുടെ ദേവാലയങ്ങളില്‍ കാതോലിക്കേറ്റ് പതാക ഉയര്‍ത്തുകയും പ്രത്യേക പ്രാര്‍ത്ഥനകള്‍ നടത്തുകയും ചെയ്തു. പരുമല സെമിനാരിയില്‍ നടന്ന കാതോലിക്കേറ്റ് ദിനാഘോഷങ്ങള്‍ക്ക് കണ്ടനാട് വെസ്റ്റ് ഭദ്രാസനാധിപന്‍ അഭി. ഡോ. മാത്യൂസ് മാര്‍ സേവേറിയോസ്  മെത്രാപ്പോലീത്താ പ്രധാന കാര്‍മികത്വം വഹിച്ചു.

യോഹന്നാന്‍ ശങ്കരത്തില്‍ കോറെപ്പിസ്‌കോപ്പ അന്തരിച്ചു

ന്യൂയോര്‍ക്ക്:  മലങ്കര ഓര്‍ത്തഡോക്‌സ് സഭയിലെ സീനിയര്‍ വൈദികന്‍ യോഹന്നാന്‍ ശങ്കരത്തില്‍ കോറെപ്പിസ്‌കോപ്പ (85)  അന്തരിച്ചു.  അമേരിക്കന്‍ ഭദ്രാസനത്തിലെ ആദ്യ കോറെപ്പിസ്‌കോപ്പയാണ്. സംസ്‌ക്കാരം പിന്നീട്.  പ്രാരംഭ സംസ്‌ക്കാര ശുശ്രൂഷകള്‍ ന്യൂയോര്‍ക്ക് ലോങ് ഐലന്‍ഡ് ലെവിറ്റ് ടൗണ്‍ സെന്റ് തോമസ് ഓര്‍ത്തഡോക്‌സ് പളളിയില്‍ അഭി. സഖറിയാസ് മാര്‍ നിക്കോളാവോസ് മെത്രാപ്പോലീത്തായുടെ കാര്‍മികത്വത്തില്‍ നടക്കും.

ലോങ് ഐലന്‍ഡ് സെന്റ് തോമസ് ഓര്‍ത്തഡോക്‌സ് പളളി വികാരിയാണ്.ഹൃദയ ശസ്ത്രക്രിയയെ തുടര്‍ന്ന് ന്യൂയോര്‍ക്കിലെ ആശുപത്രിയില്‍ ചികിത്സയിലായിരുന്നു. കുമ്പഴ ശങ്കരത്തില്‍ കുടുംബാംഗമാണ്. ഓര്‍ത്തഡോക്‌സ് സഭാ മാനേജിങ് കമ്മറ്റിയംഗം, അമേരിക്കന്‍ ഭദ്രാസന സെക്രട്ടറി എന്നീ നിലകളില്‍ പ്രവര്‍ത്തിച്ചിട്ടുണ്ട്.  ഭാര്യ : എല്‍സി യോഹന്നാന്‍ (റിട്ട. എന്‍ജിനീയര്‍, നാസോ കൗണ്ടി, ഡി.പി.ഡബ്ല്യു)  മക്കള്‍: മാത്യൂ യോഹന്നാന്‍ ( ഇന്‍വെസ്റ്റമെന്റ് ബാങ്കര്‍), തോമസ് യോഹന്നാന്‍ (കോര്‍പറേറ്റ് അറ്റോര്‍ണി)

നിയമവാഴ്ച ഉറപ്പാക്കാതെ മലങ്കരസഭാന്തരീക്ഷം ശാന്തമാവുകയില്ല -ഫാ. ഡോ. ജോണ്‍സ് എബ്രഹാം കോനാട്ട്

മലങ്കര സഭാ തര്‍ക്കത്തിന്റെ താത്വികവും, ചരിത്രപരവുമായ വസ്തുതകള്‍ സത്യസന്ധമായും സമഗ്രമായും പഠിച്ചാല്‍ മാത്രമേ പ്രശ്‌ന പരിഹാരത്തിന് ഉതകുന്ന മാര്‍ഗ്ഗ നിര്‍ദ്ദേശങ്ങള്‍ നല്‍കാനാവൂ. നിര്‍ഭാഗ്യവശാല്‍ പല തെറ്റിദ്ധാരണകളും, അര്‍ദ്ധസത്യങ്ങളും കൂട്ടിക്കലര്‍ത്തിയ പ്രചരണങ്ങളാണ് മാദ്ധ്യമങ്ങള്‍ മുഖേന പൊതു സമൂഹത്തില്‍ എത്തിക്കൊണ്ടിരിക്കുന്നത്. മലങ്കരസഭ ഈ പ്രശ്‌നത്തില്‍ എടുത്തിട്ടുള്ള നിലപാട് അന്നും ഇന്നും ഒന്നു തന്നെയാണ്. മലങ്കരസഭ എന്തെങ്കിലും നിയമനിഷേധമോ, ഉഭയസമ്മത കരാര്‍ ലംഘനമോ നടത്തിയതുകൊണ്ടല്ല ഈ പ്രശ്‌നം ആരംഭിച്ചത്. സമാധാനപരമായ പ്രശ്‌നപരിഹാരത്തിന് അനേകം ചര്‍ച്ചകളില്‍ സഭ സഹകരിച്ചു. എന്നാല്‍ അതുകൊണ്ടൊന്നും തീരാതെ വന്നപ്പോഴാണ് പ്രശ്‌നം കോടതികളുടെ പരിഗനയില്‍ എത്തിയത്. ഇനിയിപ്പോള്‍ ശാശ്വതമായ ഒരു സമാധാനത്തിന് കോടതിവിധി അംഗീകരിക്കേണ്ടത് അനിവാര്യമാണ്. വളരെയധികം തെറ്റിദ്ധാരണകളും അസത്യങ്ങളും മറുവിഭാഗം പരത്തുന്നുണ്ട് എന്നത് സങ്കടകരമായ സംഗതിയാണ്. അത്തരം തെറ്റായ പ്രചരണങ്ങളാണ് ഇന്ന് സമാധാനത്തെ ഏറ്റവും അധികം തടസപ്പെടുത്തുന്നത്.

പള്ളികളുടെ ഉടമസ്ഥത
മലങ്കരസഭയിലെ പുരാതന പള്ളികളെല്ലാം ആരംഭം മുതലേ പാത്രിയര്‍കീസ് വിഭാഗത്തിന്റേതു മാത്രമായിരുന്നു എന്നും അവിടെ നിന്ന് അവരെ പുറത്താക്കി പള്ളി പിടിച്ചെടുക്കുവാന്‍ ഓര്‍ത്തഡോക്‌സ് സഭ ശ്രമിക്കുന്നു എന്നുമുള്ള വ്യാഖ്യാനം സത്യവിരുദ്ധമാണ്. സഭയില്‍ കലഹം ആരംഭിക്കുന്നതിന് ദശാബ്ദങ്ങളും നൂറ്റാണ്ടുകളും മുമ്പ്, ഇന്ന് തര്‍ക്കത്തില്‍ ഉള്‍പ്പെട്ടിരിക്കുന്ന ഇരുകൂട്ടരുടെയും പൂര്‍വികന്മാര്‍ ഒരുമിച്ചു നിന്ന് പടുത്തുയര്‍ത്തിയ പള്ളികള്‍ എങ്ങിനെ അവരുടെത് മാത്രമാകും. ക്രമീകൃതമായ നിയമങ്ങളുടെ അടിസ്ഥാനത്തില്‍ എല്ലാവരും ചേര്‍ന്ന് ഭരിച്ചുകൊണ്ടിരുന്ന, ഓടയ്ക്കാലി, പിറവം, കോതമംഗലം മുതലായ പള്ളികളില്‍ നിന്ന് 1973-74 കാലത്ത് ഓര്‍ത്തഡോക്‌സ് സഭയുടെ വൈദികരെയും ജനങ്ങളെയും ബലപ്രയോഗത്തിലൂടെ പുറത്താക്കി, പിടിച്ചെടുത്ത്, കഴിഞ്ഞ കുറേ വര്‍ഷങ്ങളായി യാതൊരു വ്യവസ്ഥയുമില്ലാതെ ഭരണം നടത്തിക്കൊണ്ടിരിക്കുന്ന പാത്രിയര്‍ക്കീസ് വിഭാഗം, ആ പള്ളികളുടെയെല്ലാം ഏകമാത്ര അവകാശികളാകുന്നതെങ്ങനെയാണ്? അന്നുമുതല്‍ കേസു നടത്തി അന്തിമ വിധി വന്നു, പള്ളികള്‍ എങ്ങിനെ ഭരിക്കപ്പെടണം എന്ന് കോടതികള്‍ ആവര്‍ത്തിച്ചു പ്രഖ്യാപിച്ചു. കോടതി നിര്‍ദ്ദേശിച്ച ഭരണക്രമം നടപ്പാക്കാന്‍ മാത്രമാണ് ഓര്‍ത്തഡോക്‌സ് സഭ ആവശ്യപ്പെടുന്നത്. ഒരു വിശ്വാസിയും അവിടെനിന്ന് ഇറങ്ങിപ്പോകേണ്ടിവരികയില്ല. ഭരണക്രമം മാറുമ്പോള്‍ തങ്ങളുടെ മേല്‍ക്കൈ നഷ്ടപ്പെടുമെന്നു ഭയക്കുന്ന പാത്രിയര്‍ക്കീസ് വിഭാഗം നേതാക്കള്‍ പൊതുജനത്തെ കള്ളങ്ങള്‍ പറഞ്ഞ് വിശ്വസിപ്പിച്ച് പ്രക്ഷോഭണം നയിക്കുവാന്‍ ശ്രമിക്കുകയാണ്. ഏതാനും വര്‍ഷങ്ങളായി പാത്രിയര്‍ക്കീസ് വിഭാഗം കൈയടക്കിവച്ച് അവരുടെ ഭരണക്രമം നടപ്പാക്കിപ്പോരുന്ന പള്ളികളില്‍, പള്ളിഭോഗങ്ങള്‍ കൊടുക്കുന്ന എല്ലാവരും അവരുടെ വിശ്വാസികളാണ് എന്ന പ്രചരണവും മിത്ഥ്യയാണ്. ഭീഷണിയുടെ മുന്നില്‍ മറ്റു മാര്‍ഗ്ഗങ്ങള്‍ ഇല്ലാതെ നിവൃര്‍ത്തികേടുകൊണ്ടാണ് പലരും ആ വിഭാഗത്തോട് ചേര്‍ന്നു നില്‍ക്കുന്നത് എന്നതല്ലേ പരമാര്‍ത്ഥം? എല്ലാവരും കോടതിവിധി അനുസരിച്ചേ മതിയാകൂ എന്ന സത്യം പാത്രിയര്‍ക്കീസ് വിഭാഗം മനസിലാക്കണം.

വിട്ടുവീഴ്ച ആരോട് എപ്പോള്‍
പലരും പറയുന്ന ഒരു ന്യായമാണ് ‘ഓര്‍ത്തഡോക്‌സ് സഭ കേസ് ജയിച്ചു എങ്കിലും സമാധാനത്തിനുവേണ്ടി വിട്ടുവീഴ്ച ചെയ്യണം’ എന്നത്. അത് ഒരു ക്രിസ്തീയ തത്വമാണെന്ന് സമ്മതിക്കുന്നു. എന്നാല്‍ ക്ഷമിക്കേണ്ടത് അനുതാപികളോടാണ്. തെറ്റിപ്പോയി എന്നും തോറ്റുപോയി എന്നും സമ്മതിക്കുന്നവരോട് ക്ഷമിക്കണം, മറ്റു മാര്‍ഗ്ഗങ്ങളില്ലാത്തതിനാല്‍ സഹായിക്കണം എന്ന് ആവശ്യപ്പെടുന്നവരെ സഹായിക്കണം. ശത്രു ആണെങ്കിലും അനുതാപികളോട് ക്ഷമിക്കണം. എന്നാല്‍ എത്ര തോല്‍വി നേരിട്ടാലും വീണ്ടും ധാര്‍ഷ്ഠ്യത്തോടെ അക്രമം കൊണ്ട് അവയെല്ലാം മറി കടക്കാനാണ് പാത്രിയര്‍ക്കീസ് വിഭാഗം ശ്രമിക്കുന്നത്.

1973 മുതല്‍ ഓര്‍ത്തഡോക്‌സ് സഭയിലെ വൈദികരെയും ജനങ്ങളെയും പുറത്താക്കി പള്ളികള്‍ പിടിച്ചെടുത്തത് തെറ്റായിരുന്നു എന്ന ബോധ്യം പാത്രിയര്‍ക്കീസ് വിഭാഗത്തിന് ഉണ്ടോ? ഉമ്മിണിക്കുന്ന് പള്ളിയില്‍ ഒരു വൈദികന്റെ പിതാവ് മരിച്ചപ്പോള്‍ കബറടക്കാന്‍ സമ്മതിക്കാതെ 3 ദിവസം വച്ചിരുന്നിട്ട് 30 കാലോമീറ്റര്‍ ദൂരെ മറ്റൊരു പള്ളിയിലെ സെമിത്തേരിയില്‍ കബറടക്കേണ്ടിവന്ന സാഹചര്യം സൃഷ്ടിച്ചതിനെക്കുറിച്ച് യാക്കോബായ നേതൃത്വത്തിന് അനുതാപമുണ്ടോ? ഓടക്കാലി പള്ളിയില്‍ മൃതദേഹങ്ങള്‍ സംസ്‌ക്കരിക്കുവാന്‍ സെമിത്തേരിയുടെ കവാടം പോലും തുറന്നുതരാതിരുന്ന സംഭവങ്ങളെക്കുറിച്ച് അനുതാപമുണ്ടോ? നീണ്ട വര്‍ഷങ്ങള്‍ അനീതിയും അക്രമവും സഹിക്കേണ്ടിവന്നപ്പോള്‍ ഓര്‍ത്തഡോക്‌സ് വിശ്വസികള്‍ വീഴ്‌ത്തേണ്ടി വന്ന കണ്ണുനീരിന് ദൈവം നല്‍കിയ പ്രതിഫലമാണ് 2017 ലെ സുപ്രീംകോടതി വിധി എന്നു ഞങ്ങള്‍ വിശ്വസിക്കുന്നു.

മുന്‍കാലത്ത് നടന്ന പ്രതികരണങ്ങളില്‍ക്കൂടിയാണ് വിട്ടുവീഴ്ച കൊണ്ട് സമാധാനം ഉണ്ടാകുമോ എന്ന് നിശ്ചയിക്കാനാവുന്നത്. 1958 ല്‍ കോടതി അനുവദിച്ച ഭീമമായ കോടതിച്ചിലവ് ഓര്‍ത്തഡോക്‌സ് സഭ സമാധാനത്തിനായി വേണ്ടെന്ന് വച്ചിട്ട് ഫലം എന്തായിരുന്നു? 12 വര്‍ഷം കഴിഞ്ഞപ്പോള്‍ അതേ കാരണങ്ങള്‍ തന്നെ പറഞ്ഞ് യുദ്ധം പുനരാരംഭിച്ചു. അനേക പ്രാവശ്യം സമാധാന ചര്‍ച്ചകള്‍ക്ക് തയ്യാറായിട്ട് ലഭിച്ച ഫലം എന്താണ്? കോടതിവിധി നടത്തിപ്പ് താമസിപ്പിക്കുവാനുള്ള ഒരു ഉപാധിയായി ചര്‍ച്ചകളെ ഉപയോഗിച്ചു. ആലുവാ തൃക്കുന്നത്തു സെമിനാരി കബറിങ്കല്‍ കയറി പ്രാര്‍ത്ഥിക്കുവാന്‍ സ്‌നേഹപൂര്‍വ്വം അനുമതി നല്‍കിയതിന്റെ ഫലം, രാത്രിയില്‍ ചാപ്പലില്‍ കയറി നശീകരണം നടത്തുകയും വൈദികരെ മര്‍ദ്ദിക്കുകയും ചെയ്തു. എഗ്രിമെന്റുകള്‍ മാനിച്ച് ആത്മസംയമനം പാലിച്ച മറ്റനേകം സന്ദര്‍ഭങ്ങളും ഓര്‍ത്തഡോക്‌സ് സഭയെ കീഴ്‌പ്പെടുത്താനുള്ള അവസരങ്ങളായി മറുവിഭാഗം ഉപയോഗപ്പെടുത്തുക മാത്രമാണ് ചെയ്തത്്. ഈ ചരിത്രവസ്തുതകള്‍ അറിഞ്ഞുകൂടാത്തവരും, ബോധപൂര്‍വ്വം മറക്കാന്‍ ശ്രമിക്കുന്നവരുമാണ് വിട്ടുവീഴ്ച ചെയ്യണം എന്ന് ആവശ്യപ്പെടുന്നത്.

ഇത്രയെല്ലാം സംഭവിച്ചിട്ടും. ഓര്‍ത്തഡോക്‌സ് സഭ പാത്രിയര്‍ക്കീസ് വിഭാഗത്തിലെ ജനങ്ങളെ ആരാധനാലയങ്ങളില്‍ നിന്നും പുറത്താക്കുന്നില്ല. അവരെ ക്ഷമാപൂര്‍വ്വം ഉള്‍ക്കൊള്ളാന്‍ തയ്യാറാണ്. എന്നാല്‍ വിധി നടപ്പാകുമ്പോള്‍ സഹകരിക്കാന്‍ തയ്യാറാവാതെ ബഹളമുണ്ടാക്കി സ്വയം ഓടിപ്പോയിട്ട് പള്ളികളില്‍ നിന്ന് പുറത്താക്കി എന്നു പറയുന്നത് സത്യവിരുദ്ധമാണ്.

1934-ലെ ഭരണഘടന
രാജ്യത്തെ കോടതികള്‍ പലപ്രാവശ്യം സാധുവെന്ന് പ്രഖ്യാപിച്ച സഭാഭരണഘടന വ്യാജരേഖയാണെന്ന വാദം അടുത്തകാലത്താണ് പാത്രിയര്‍ക്കീസ് വിഭാഗം ഉയര്‍ത്തുവാന്‍ ആരംഭിച്ചത്. 1958-ല്‍ അന്ത്യോഖ്യ പാത്രിയര്‍ക്കീസ് ഉള്‍പ്പെടെ, സഭ മുഴുവനും അംഗീകരിക്കുകയും, അതിനുശേഷം കോതമംഗലം, വടകര, കണ്ടനാട്, മുളന്തുരുത്തി മുതലായ സഭയിലെ ഓരോ പള്ളിയും പൊതുയോഗം വിളിച്ചുകൂട്ടി ഇതേ ഭരണഘടന അംഗീകരിക്കുന്നു എന്ന് പാസാക്കുകയും അതനുസരിച്ച് ഭരണം നടത്തുകയും മലങ്കര അസോസിയേഷന്‍, ഭദ്രാസന പൊതുയോഗം മുതലായ സമിതികളിലേക്ക് പ്രതിനിധികളെ തിരഞ്ഞെടുത്ത് അയയ്ക്കുകയും എല്ലാം ചെയ്തിരുന്നതാണ്. 1967-ല്‍ സഭമുഴുവനും ഒന്നായി ചേര്‍ന്ന് നിന്ന് ഈ ഭരണഘടന ഭേദഗതി ചെയ്തിട്ടുള്ളതാണ്. 1995-ല്‍ അവസാനിച്ച കേസില്‍ പാത്രിയര്‍ക്കീസ് വിഭാഗത്തിന്റെ പ്രധാന ആവശ്യം അതില്‍ ചില ക്ലോസുകള്‍ ഭേദഗതി ചെയ്യണം എന്നതായിരുന്നു. അത് കോടതി അനുവദിച്ചതനുസരിച്ച് ഭേദഗതി ചെയ്തു. അന്നുണ്ടായിരുന്ന പാത്രിയര്‍ക്കീസ് വിഭാഗത്തിലെ മെത്രാപ്പോലീത്തമാര്‍ എല്ലാവരും ഈ രേഖയ്ക്ക് വിധേയത്വം എഴുതി സമര്‍പ്പിച്ചതാണ്. അന്നൊന്നും ഇല്ലാതിരുന്ന ആരോപണമാണ് ഇന്ന് പുതുതായി ഉയര്‍ത്തിയിരിക്കുന്നത്.

ഭരണഘടനയുടെ ഒറിജിനല്‍ കാണിച്ചാല്‍ മാത്രമേ അത് സാധുവാകൂ എന്ന വാദവും കോടതി തള്ളിയതാണ്. 1934-നുശേഷം അത് പലപ്രാവശ്യം കോടതികളില്‍ സമര്‍പ്പിച്ചിട്ടുള്ളതാണ്. അത് കോടതികള്‍ക്ക് ബോധ്യമായതുകൊണ്ടാണ് കോടതി ഇങ്ങനൊരുകാര്യം വീണ്ടും ആവശ്യപ്പെടാത്തത്. ഭരണപരമായ ക്രമം മാത്രം ഉള്‍ക്കൊള്ളുന്ന രേഖ എന്ന നിലയില്‍ അത് രജിസ്റ്റര്‍ ചെയ്യേണ്ടതില്ല എന്നും സുപ്രീംകോടതി വിധിയില്‍ വ്യക്തമാക്കപ്പെട്ടിട്ടുള്ളതാണ്.
സ്വന്തലാഭത്തിനായി വേദപുസ്തക വ്യാഖ്യാനം ഓര്‍ത്തഡോക്‌സ് സഭയുടെ പ്രവൃത്തികള്‍ ക്രിസ്തീയമല്ല എന്നു കുറ്റപ്പെടുത്തുന്നവര്‍ അനേകരുണ്ട്. അവരില്‍ പലരും സ്വന്തലാഭത്തിനായി വേദപുസ്തകം വ്യാഖ്യാനിക്കുന്നവരാണ്. നിന്റെ അയല്‍ക്കാരന്റെ കണ്ണിലെ കരട് എടുക്കാന്‍ ശ്രമിക്കുന്നതിന് മുമ്പ് സ്വന്തകണ്ണിലെ കോല് നീക്കണം എന്ന്് ഉപദേശിച്ച ക്രിസ്തുനാഥന്റെ വാക്കുകള്‍ മറന്നുകൊണ്ടാണ് പലരും ഓര്‍ത്തഡോക്‌സ് സഭയുടെ പ്രവൃത്തികള്‍ ക്രിസ്തീയമല്ല എന്നു കുറ്റപ്പെടുത്തുന്നത്. കുറ്റപ്പെടുത്തുന്നവരെല്ലാം സ്വന്തചരിത്രത്തിലേക്കു തിരിഞ്ഞു നോക്കണം, സമാനമായ സാഹചര്യങ്ങളില്‍ എന്തുചെയ്തു എന്ന് വിലയിരുത്തണം. പാപമില്ല എന്നും കൈകള്‍ ശുദ്ധമെന്നും ബോധ്യമുള്ളവര്‍ മാത്രം കല്ലെറിയട്ടെ – അത് സ്വന്തസഭാംഗങ്ങളായാലും, ഇതരസഭാ നേതാക്കളായാലും.

ഇവിടെ കലാപം ഉണ്ടാക്കുവാന്‍ ശ്രമിക്കുന്നത് ആരാണ്. നിയമനിര്‍മ്മാണ സമിതിയും, നിയമനടത്തിപ്പ് വിഭാഗവും, നീതിന്യായ കോടതികളും (ഹലഴശഹെമൗേൃല, ലഃലരൗശേ്‌ല മിറ ഷൗറശരശമൃ്യ) പരസ്പരം സഹകരിച്ച് പ്രവര്‍ത്തിക്കുന്ന രാജ്യത്തെ മാത്രമേ ജനാധിപത്യ രാജ്യം എന്നു വിളിക്കാനാവൂ. അപ്രകാരം സഹകരിച്ച് നീതി നടപ്പാക്കാന്‍ നോക്കുമ്പോള്‍ ഇവിടെ കലാപമുണ്ടാക്കുന്നതാരാണ്? വാളെടുക്കുന്നവന്‍ വാളാലെ എന്നു പഠിപ്പിച്ച കര്‍ത്താവ് പള്ളി സംരക്ഷിക്കുവാന്‍ വേണ്ടി അക്രമം നടത്തുവാന്‍ അനുവദിച്ചിട്ടുണ്ടോ? പള്ളികളില്‍ നിന്ന് വ്യാപകമായ മോഷണം നടത്തുന്നതും, പള്ളിക്കുചുറ്റും കിടങ്ങ് കുഴിക്കുന്നതും, അതിവിശുദ്ധസ്ഥലം അശുദ്ധപ്പെടുത്തുന്നതുമാണോ ക്രിസ്തീയത? ഇതാണോ സകലവും നഷ്ടപ്പെട്ടവന്റെ കണ്ണീരും രോദനവും? വലിയബഹളങ്ങള്‍ ഉണ്ടാക്കി ബലപ്രയോഗത്താല്‍ അറസ്റ്റ് ചെയ്യപ്പെടണമെന്ന് വാശിപിടിക്കുകയും മറ്റും ചെയ്തത് പാത്രിയര്‍ക്കീസ് വിഭാഗം നേതാക്കളാണ്.
രണ്ടു സഭയും രണ്ടു വിശ്വാസവും രണ്ടുസഭയും രണ്ടു വിശ്വസവും ആണെന്നു പറയുന്നവര്‍, എന്നുമുതലാണ് ഇത്് സംഭവിച്ചത് എന്നുകൂടി പറയണം. 1970 വരെ വിശ്വാസത്തിലും പാരമ്പര്യത്തിലും ഒരു വ്യത്യാസവും ഉള്ളതായി പറഞ്ഞുകേട്ടിട്ടുപോലുമില്ല. ഇപ്പോഴും അല്‍പ്പമെങ്കിലും വേദശാസ്ത്രം അറിയാവുന്ന ആരും വിശ്വാസം രണ്ടാണ് എന്നു പറയില്ല. ഒരേ ആരാധനാക്രമവും, ഒരേ ആചാരാനുഷ്ഠാനങ്ങളും പുലര്‍ത്തുന്ന ഏകസഭയുടെ ഭാഗമായിട്ടേ എല്ലാവരെയും ഞങ്ങള്‍ക്ക് കാണാന്‍ കഴിയുന്നുള്ളു. മാര്‍ത്തോമ്മാശ്ലീഹായും, മാര്‍ പത്രോസ് ശ്ലീഹായും പഠിപ്പിച്ചത് രണ്ടു വിശ്വാസങ്ങളും പാരമ്പര്യങ്ങളുമാണ് എന്ന ചിന്തതന്നെ അപ്പൊസ്‌തോലിക പിന്‍തുടര്‍ച്ച എന്ന തത്വത്തിന്റെ വികലമായ വ്യാഖ്യാനമാണ്. അപ്പൊസ്‌തോല സമൂഹത്തിലെ ഓരോ അംഗവും വ്യത്യസ്തവിശ്വാസങ്ങളല്ല ഏകവിശ്വാസമാണ് പഠിപ്പിച്ചത് എന്ന ബാലപാഠം പോലും മനസിലാക്കാതെയാണ് സ്വന്തലാഭത്തിനായി വ്യാഖ്യാനങ്ങള്‍ നടത്തുന്നത്.
ഇനി വിശ്വാസം വ്യത്യസ്തമാണ് എന്ന് സ്ഥാപിച്ചേ മതിയാവൂ എങ്കില്‍ അതിനും വിരോധമില്ല. പാത്രിയര്‍ക്കീസ് വിഭാഗം മലങ്കര ഓര്‍ത്തഡോക്‌സ് സിറിയന്‍ സഭയുടെ ഭാഗമായി നില്‍ക്കാന്‍ ആഗ്രഹിക്കുന്നില്ല എങ്കില്‍ ആര്‍ക്കും വിരോധിക്കാനാവില്ല, പക്ഷെ സഭയുടെ പള്ളികളിന്മേലും സ്വത്തുക്കളിന്മേലും യാതൊരു അവകാശവും ഉണ്ടാവില്ല. ഏതൊരു മതത്തിലും വിശ്വസിക്കാനുള്ള സ്വാതന്ത്ര്യം ഇന്‍ഡ്യന്‍ ഭരണഘടന ഓരോ പൗരനും നല്‍കുന്നുണ്ട് അതനുസരിച്ച് ഒരു പുതിയ സഭയായി നിലകൊള്ളാം. അതിനെ ആരും എതിര്‍ക്കുകയില്ല.

ഹിതപരിശോധന
ഈ പ്രശ്‌നത്തില്‍ ഹിതപരിശോധന പരിഹാരമായിരുന്നു എങ്കില്‍ എന്തിന് കേസ് ആരംഭിച്ചു? മലങ്കരസഭയില്‍ ഒരു ഹിതപരിശോധനയ്ക്ക് സുവര്‍ണ്ണാവസരം 2002-ല്‍ ലഭിച്ചപ്പോള്‍ അതു പ്രയോജനപ്പെടുത്താതെ അതിനോട് നിസ്സഹകരിച്ചതെന്തുകൊണ്ട് എന്ന് വിശദീകരിക്കാമോ? പാത്രിയര്‍ക്കീസ് വിഭാഗത്തിലെ ഇടുക്കി ഭദ്രാസനത്തിന്റെ പ്രശ്‌നം പരിഹരിക്കുവാന്‍ എന്തുകൊണ്ടാണ് ഹിതപരിശോധന നടത്താതിരുന്നത്? നിയമവും എഗ്രിമെന്റുകളും ലംഘിക്കുന്നവരെ നേര്‍വഴികാണിക്കുവാന്‍ ഹിതപരിശോധനയല്ല, നിയമനടപടിയാണ് ആവശ്യം.
2017 സുപ്രീംകോടതി വിധിയുടെ 28 കണ്ടെത്തലുകളില്‍ 17-ാം പാരഗ്രാഫില്‍ വ്യക്തമായി പറയുന്നു. പള്ളിയും സെമിത്തേരിയും ആര്‍ക്കും കൈയേറാനാവില്ല. മലങ്കര സഭയുടെയും ഇടവകകളുടെയും സ്വത്തുക്കള്‍ ഒരു ട്രസ്റ്റാണെന്നും ഭൂരിപക്ഷത്തിന്റെ പേരിലായാല്‍പോലും അത് മറ്റാര്‍ക്കും കൈവശപ്പെടുത്തനാവില്ലെന്നും സംശയത്തിന് ഇടനല്‍കാതെ പറഞ്ഞിരിക്കുന്നു.
നിയമനിര്‍മ്മാണം പരിഹാരമോ
ജനാധിപത്യ വ്യവസ്ഥയില്‍ നിയമനിര്‍മ്മാണത്തിലൂടെ കോടതിവിധി മറികടക്കാനുള്ള മുറവിളി അപലപനീയമാണ്. അങ്ങിനെയെങ്കില്‍ രാജ്യത്ത് കോടതികളുടെ ആവശ്യമില്ലല്ലോ. എന്തിനാണ് പാത്രിയര്‍ക്കീസ് വിഭാഗം തന്നെ കേസ് ആരംഭിച്ചത്? കേസുകൊടുത്തിട്ട് വാദിഭാഗം തന്നെ വിധി അനുസരിക്കില്ല എന്ന് പരസ്യമായി പ്രസ്താവിക്കുന്നത് ക്രിസ്തീയമാണോ? ഇനി നിയമം ഉണ്ടാക്കിയാല്‍ തന്നെ ആ നിയമം, എല്ലാറ്റിനോടും വിഘടിച്ചുനില്‍ക്കുന്ന ഒരുകൂട്ടം, അനുസരിക്കുമെന്നതിന് എന്താണ് ഉറപ്പ്. ഉള്ള നിയമങ്ങള്‍ അനുസരിക്കാത്തവര്‍ പുതിയ നിയമങ്ങളെ അനുസരിക്കുമോ? ഇന്ത്യയിലെ സുപ്രീംകോടതി പറഞ്ഞിട്ട് അനുസരിക്കാത്തവര്‍ മറ്റ് ഏതെങ്കിലും മദ്ധ്യസ്ഥനെ അനുസരിക്കുമോ? സെമിത്തേരി ഓര്‍ഡിനന്‍സിന്റെ ന്യൂനതകള്‍ പാത്രിയര്‍ക്കീസ് വിഭാഗം തന്നെ അനുഭവിക്കാന്‍ തുടങ്ങിയതുകൊണ്ടാണ് ഇപ്പോള്‍ കട്ടച്ചിറപോലുള്ള പള്ളികളില്‍ പുതിയ സംഘര്‍ഷം ആരംഭിച്ചിരിക്കുന്നത്.

സുപ്രീംകോടതിവിധി രാജ്യത്തിന്റെ നിയമമാണ്. അതിനെ മറികടക്കുവാനായി, അതിലെ വ്യവസ്ഥകള്‍ക്ക് എതിരായി നിയമസഭകള്‍ക്ക് നിയമം നിര്‍മ്മിക്കാനാവുമോ? കാവേരി നദീജല പ്രശ്‌നത്തിലും കണ്ണൂര്‍ മെഡിക്കല്‍ കോളജ് പ്രശ്‌നത്തിലും സര്‍ക്കാരുകള്‍ കോടതിവിധിക്കെതിരെ നിയമം നിര്‍മ്മിക്കാന്‍ ഒരുമ്പെട്ടപ്പോള്‍ കോടതി നല്‍കിയ താക്കീത് ശ്രദ്ധേയമാണ്. ജസ്റ്റീസ് കെ. റ്റി. തോമസ് സമര്‍പ്പിച്ചു എന്നു പറയപ്പെടുന്ന റിപ്പോര്‍ട്ടില്‍ മേല്‍ സൂചിപ്പിച്ച 17-ാം പാരഗ്രാഫിന് കടക വിരുദ്ധമായ നിയമനിര്‍മ്മാണം നടത്തുവാനാണ് ശുപാര്‍ശ ചെയ്തിരിക്കുന്നത്.

പുതിയ സമരാഹ്വാനത്തിന്റെ കാരണം
കോടതിവിധി നടപ്പായ പലപള്ളികളിലെയും ജനങ്ങള്‍ സാവധാനം വ്യവസ്ഥാപിത ഭരണക്രമത്തോട് സഹകരിച്ചുപോകാന്‍ ആരംഭിച്ചു എന്നതാണ് പുതിയ സമരാഹ്വാനത്തിന്റെ കാരണം. അതു തങ്ങളുടെ ഭാവി ഇരുളടഞ്ഞതാക്കുമോ എന്ന ഭയമാണ് ഇപ്പോള്‍ പാത്രിയര്‍ക്കീസ് വിഭാഗത്തെ അലട്ടുന്നത്.

പരസ്പരവിശ്വാസവും ആത്മാര്‍ത്ഥതയും പ്രവര്‍ത്തന ഐക്യവും ഉണ്ടെങ്കില്‍ മാത്രമേ സമാധാനപരമായി പ്രശ്‌നം പരിഹരിക്കാനാവൂ. ഏതാനും വര്‍ഷത്തെ ഇടപെടല്‍കൊണ്ട് പാത്രിയര്‍ക്കീസ് വിഭാഗം നഷ്ടപ്പെടുത്തിയതും അതൊക്കെത്തന്നെയാണ്. അവയെല്ലാം വീണ്ടെടുക്കുവാന്‍ ശ്രമിക്കുന്തോറും ഭ്രഷ്ട് കല്‍പ്പിച്ചും, വീണ്ടും വി. മൂറോന്‍ അഭിഷേകം നടത്തിയും, സഭാതലവന്റെ കോലം കത്തിച്ചും, അസത്യങ്ങള്‍ പ്രചരിപ്പിച്ചും, സമരാഹ്വാനം നടത്തിയും, വെല്ലുവിളിച്ചും കൂടുതല്‍ അകലുന്ന പ്രവണതയാണ് ഇപ്പോള്‍ കാണുന്നത്.

ആഗോള സുറിയാനി സംഗീത സമ്മേളനത്തില്‍ ശ്രുതി സംഗീത വിദ്യാലയവും

കോട്ടയം: ജനീവയില്‍ മാര്‍ച്ച് 17 ന് ആരംഭിക്കുന്ന ആഗോള സുറിയാനി സംഗീത സമ്മേളനത്തില്‍ ഇന്ത്യയെ പ്രതിനിധീകരിച്ച് കോട്ടയം ഓര്‍ത്തഡോക്‌സ് വൈദിക സെമിനാരിയുടെ ഭാഗമായ ശ്രുതി ആരാധനാ സംഗീത വിദ്യാലയവും പങ്കെടുക്കും. ഇറാക്ക്, ലബനോന്‍, സിറിയ, തുര്‍ക്കി, ജര്‍മ്മനി, അമേരിക്ക തുടങ്ങിയ രാജ്യങ്ങളില്‍ നിന്നുളള സംഗീതജ്ഞര്‍ പങ്കെടുക്കുന്ന സമ്മേളനമാണ് ജനീവയില്‍ സംഘടിപ്പിക്കുന്നത്. വിവിധ സുറിയാനി പാരമ്പര്യങ്ങളിലെ സംഗീതത്തെപ്പറ്റി ലോകപ്രശസ്ത പണ്ഡിതര്‍ പ്രബന്ധങ്ങളും സംഗീതവും അവതരിപ്പിക്കും. സമ്മേളനത്തിന്റെ ഭാഗമായി മാര്‍ച്ച് 21 ന് നടക്കുന്ന സുറിയാനി സംഗീത കണ്‍സേര്‍ട്ടില്‍ ഫാ. ഡോ. എം.പി. ജോര്‍ജ്ജിന്റെ നേതൃത്വത്തില്‍ 300 ല്‍ പരം ഗായകര്‍ അണിനിരക്കുന്ന ഗായകസംഘം സുറിയാനി ഗീതങ്ങള്‍ അവതരിപ്പിക്കും. ശ്രുതി ഡയറക്ടര്‍ ഡോ. സഖറിയാസ് മാര്‍ അപ്രേം മെത്രാപ്പോലീത്ത, വൈദിക സെമിനാരി പ്രിന്‍സിപ്പാള്‍ ഫാ.ഡോ. ജോണ്‍സ് ഏബ്രഹാം കോനാട്ട്, ഫാ. ഡോ. എം.പി.ജോര്‍ജ്ജ് എന്നിവര്‍ പ്രബന്ധങ്ങള്‍ അവതിരിപ്പിക്കും. ശ്രുതി അസി. ഡയറക്ടര്‍ ഫാ. ഡോ. മാത്യൂ വര്‍ഗ്ഗീസിന്റെ നേതൃത്വത്തില്‍ ഒരുക്കങ്ങള്‍ പൂര്‍ത്തിയായിവരുന്നു. http://syriacmusic2021.org/home/registration/ എന്ന വെബ്‌സൈറ്റില്‍ പരിപാടികള്‍ ദൃശ്യമാണ്.

ചെറിയപള്ളിക്കു സർക്കാർ അംഗീകാരം

കോട്ടയം:അക്ഷര ടൂറിസം സ്‌പോട്ടുകളുടെ പട്ടികയില്‍ മലങ്കര ഓര്‍ത്തഡോക്‌സ് സഭയുടെ ചെറിയപളളി ഇടം നേടി. സഹകരണ വകുപ്പ് കോട്ടയത്ത് ആരംഭിക്കുന്ന അക്ഷര മ്യൂസിയത്തിന്റെ പ്രവര്‍ത്തനങ്ങളുടെ ഭാഗമായി നടപ്പാക്കുന്നതാണ് ‘ അക്ഷര ടൂറിസം ‘ പദ്ധതി. ചെറിയ പളളിയെന്ന് അറിയപ്പെടുന്ന സെന്റ് മേരീസ് ഓര്‍ത്തഡോക്‌സ് പളളി 16-ാം നൂറ്റാണ്ടില്‍ നിര്‍മ്മിച്ചതാണ്. ഈ പള്ളിയിലെ അതിപുരാതനമായ ചുമർ ചിത്രങ്ങൾ, മാർ ഗബ്രിയേലിന്റെ മരണ വിവരം രേഖപ്പെടുത്തിയിരിക്കുന്ന ഫലകത്തിലെ കോലെഴുത്ത്, മാർ ഗബ്രിയേലിന്റെ ടെമ്പറ ചിത്രം, കൽത്തൂണുകളിൽ ഉറപ്പിച്ച നാടകശാല, പള്ളിയുടെ ആനപ്പള്ള മതിൽ തുടങ്ങിയവയുടെ ചരിത്രമൂല്യം പരിഗണിച്ചാണ് സർക്കാർ തീരുമാനം. ഇന്നലെ കോട്ടയത്ത് നടന്ന യോഗത്തിന് സഹകരണ വകുപ്പ് സെക്രട്ടറി മിനി ആന്റണി ഐ.എ.എസ്, റജിസ്ട്രാർ പി.ബി. നൂഹ് ഐ.എ.എസ്. എന്നിവർ നേതൃത്വം നൽകി.

പരിശുദ്ധ കാതോലിക്കാ ബാവായുടെ ആരോഗ്യനിലയില്‍ പുരോഗതി

കോട്ടയം: പരുമല സെന്റ് ഗ്രീഗോറിയോസ് ആശുപത്രിയില്‍ ചികിത്സയില്‍ കഴിയുന്ന മലങ്കര ഓര്‍ത്തഡോക്‌സ് സഭയുടെ പ്രധാന മേലദ്ധ്യക്ഷന്‍ പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവായുടെ ആരോഗ്യനിലയില്‍ മികച്ച പുരോഗതി. മരുന്നുകളോട് അദ്ദേഹം നന്നായി പ്രതികരിക്കുന്നുണ്ട്. കോവിഡ് നെഗറ്റീവ് ആയെങ്കിലും അണുബാധയുണ്ടാകാനുളള സാഹചര്യം കണക്കിലെടുത്ത് സന്ദര്‍ശകരെ പൂര്‍ണ്ണമായും നിരോധിച്ചിട്ടുണ്ടെന്നു സഭാ വക്താവ് ഫാ. ഡോ. ജോണ്‍സ് എബ്രഹാം കോനാട്ട് അറിയിച്ചു.

കേരള നിയമസഭയ്ക്ക് സുപ്രീം കോടതി വിധി മറികടന്നു നിയമനിര്‍മ്മാണം നടത്താമോ?

കേരള നിയമസഭയ്ക്ക് സുപ്രീം കോടതി വിധി മറികടന്നു നിയമനിര്‍മ്മാണം നടത്താമോ?
‘ഇല്ല’ എന്നാണ് ഉത്തരം.

കാരണം, അപ്രകാരമുള്ള ഒരു നിയമനിര്‍മ്മാണം ഭരണഘടനാ വിരുദ്ധമാണ്.
ഇന്‍ഡ്യന്‍ ഭരണഘടനയുടെ 25-ഉം 26-ഉം  അനുഛേദങ്ങള്‍ താഴെ പറയുന്നതാണ്.
മത സ്വാതന്ത്ര്യത്തിനുള്ള അവകാശം (25-28)
25. ആശയ സ്വാതന്ത്ര്യം, മതം പ്രചരിപ്പിക്കുന്നതിനും, പഠിപ്പിക്കുന്നതിനും, പ്രാബല്യത്തില്‍ കൊണ്ടുവരുന്നതിനു മുള്ള സ്വാതന്ത്ര്യം.
1) ക്രമസമാധാനം, ധാര്‍മ്മികത, പൊതുആരോഗ്യം, ഈ വകുപ്പിലെ മറ്റു പരാമര്‍ശങ്ങള്‍ എന്നിവ കാത്തുസൂക്ഷിച്ചുകൊണ്ട് ഏല്ലാവര്‍ക്കും ഇഷ്ടമുള്ള മതത്തില്‍ വിശ്വസിക്കാനും ആ വിശ്വാസം ഏറ്റുപറയാനും പ്രചരിപ്പിക്കാ
നും അവകാശമുണ്ട്.
2) ഈ വകുപ്പ്
A. മതപരമായ അനുഷ്ഠാനങ്ങളോടനുബന്ധിച്ച സാമ്പ ത്തികമോ സാമൂഹികമോ രാഷ്ട്രീയമോ മതേതരമായ മറ്റെന്തെ ങ്കിലുമോ കാര്യങ്ങളെ നിയന്ത്രിക്കുന്നതിനോ തടയുന്നതിനോ വേണ്ടിയിട്ടുള്ളതോ
B. സാമൂഹിക ഉന്നമനത്തിനു വേണ്ടിയോ പൊതു സ്വഭാവമുള്ള ഹിന്ദുസ്ഥാപനങ്ങള്‍ ഹിന്ദുമതത്തിലെ എല്ലാ വിഭാഗങ്ങള്‍ക്കുമായി തുറന്നുകൊടുക്കുന്നതിനു വേണ്ടി യിട്ടുള്ളതോ ആയ ഏതെങ്കിലും നിയമനിര്‍മ്മാണത്തെ തടസപ്പെടുത്തുന്നില്ല.
വിശദീകരണം 1: കൃപാണ്‍ ധരിക്കുന്നത് സിഖ് മതവി ശ്വാസത്തിന്റെ ഏറ്റുപറച്ചിലായി കരുതപ്പെടുന്നു.
വിശദീകരണം 2: വകുപ്പ് 2 (b) യിലെ ഹിന്ദുമതത്തെക്കുറി ച്ചുള്ള പരാമര്‍ശം ബുദ്ധ, ജൈന സിഖ് മതങ്ങള്‍ക്കും ബാധകമാണ്.
26. മതപരമായ കാര്യങ്ങള്‍ കൈകാര്യം ചെയ്യുന്നതി
നും, നിയന്ത്രിക്കുന്നതിനുള്ള സ്വാതന്ത്ര്യം.
ക്രമസമാധാനം, ധാര്‍മ്മികത, പൊതുആരോഗ്യം, ഈ വകുപ്പിലെ മറ്റു പരാമര്‍ശങ്ങള്‍ എന്നിവ കാത്തുസൂക്ഷിച്ചുകൊണ്ട് എല്ലാ മതവിഭാഗങ്ങള്‍ക്കും താഴെപ്പറയുന്ന അവകാശങ്ങളുണ്ടായിരിക്കും.
A. മതപരമോ സാമൂഹ്യസേവനപരമോ ആയ സ്ഥാപനങ്ങള്‍ തുടങ്ങുവാനും പ്രവര്‍ത്തിപ്പിക്കാനുമുള്ള അവകാശം
B. മതപരമായ പ്രവര്‍ത്തനങ്ങളെ ഭരിക്കുന്നതിനുള്ള അവകാശം
C. Movable and immovable property കൈവശം വയ് ക്കുന്നതിനുള്ള അവകാശം.
D. നിയമാനുസൃതം അത്തരം പ്രോപ്പര്‍ട്ടി നോക്കിനടത്തുന്നതിനുള്ള അവകാശം.
ഇന്‍ഡ്യന്‍ ഭരണഘടനയുടെ 25-ഉം 26-ഉം അനുഛേദങ്ങള്‍ മൗലിക അവകാശങ്ങളില്‍ പെട്ടതാണ്. ഇതുമൂലം ഇന്‍ഡ്യയിലുള്ള ഏതൊരു മതവിഭാഗത്തിനും അതിന്റെ മത കാര്യങ്ങള്‍ നടത്തിക്കൊണ്ടു പോകുവാനുള്ള അവകാശമുണ്ടെന്ന് 1954-ല്‍ സുപ്രീം കോടതി ‘ശിരൂര്‍ മഠം’ കേസില്‍ വിധിച്ചു.

ശിരൂര്‍ മഠം കേസ് വിധി
ഭരണഘടനയുടെ 26-ാം അനുഛേദ പ്രകാരം ഏതൊരു മതവിഭാഗത്തിനും വസ്തുക്കള്‍ സമ്പാദിക്കുകയും അവയുടെ ഭരണം നടത്തുകയും ചെയ്യാമെന്നതിനു പുറമെ, തങ്ങളുടെ മതപരമായ ചടങ്ങുകള്‍ നടത്തിക്കൊണ്ടു പോകാമെന്നും വിശ്വാസം സംരക്ഷിക്കാമെന്നും ഈ കേസില്‍ സുപ്രീംകോടതിയുടെ ഏഴംഗ ബഞ്ച് വിധിച്ചു. മതത്തിന്റെ അടിസ്ഥാന സ്വഭാവവും വിശ്വാസ സംഹിതകളും എന്തെല്ലാമാണെന്നു നി ര്‍ണ്ണയിക്കുവാനുള്ള അവകാശം അതതു മതവിഭാഗത്തിനു മാത്രമുള്ളതാണെന്നും സുപ്രീം കോടതി കണ്ടെത്തി. 26-ാം അനുഛേദത്തില്‍, മതവിഭാഗങ്ങള്‍ക്കു വസ്തുക്കള്‍ ഭരിക്കുന്നതിനുള്ള മൗലികാവകാശം ‘നിയമം അനുശാസിക്കുന്ന പ്രകാര’മായിരിക്കണമെന്നു പറഞ്ഞിട്ടുണ്ട്. എന്നാല്‍ ഇത് ഭരണഘടന ഉറപ്പാക്കുന്ന ഭരണാവകാശം മതവിഭാഗങ്ങളില്‍ നി ന്നും എടുത്തുമാറ്റുന്നതിനുള്ള അവകാശമല്ലായെന്നു ഈ വിധിയില്‍ വ്യക്തമാക്കപ്പെട്ടു.
1951-ലെ ‘മദ്രാസ് ഹിന്ദു റിലിജിയസ് ആന്‍ഡ് ചാരിറ്റബിള്‍ എന്‍ഡോവ്‌മെന്റ് ആക്ടി’ലെ വ്യവസ്ഥകള്‍ പ്രകാരം ശിരൂ ര്‍ മഠത്തിന്റെ ഭരണം ‘കമ്മീഷണര്‍’ ഏറ്റെടുത്തു. ഈ നി യമം ചോദ്യം ചെയ്ത്, മഠം സ്വാമിയാര്‍ ബോധിപ്പിച്ച കേസിലാണു സുപ്രീം കോടതിയില്‍ നിന്ന് സുപ്രധാനമായ ഈ വിധിയുണ്ടായത്. ഭരണഘടനയുടെ 26-ഡി അനുഛേദത്തില്‍ നിയമാനുസൃതമായി മാത്രമേ വസ്തുവിന്റെ ഭരണം നടത്താവൂ എന്നു പറഞ്ഞിട്ടുള്ളതിന്റെ അടിസ്ഥാനത്തില്‍, ഭരണം കമ്മീഷണര്‍ക്ക് ഏറ്റെടുക്കാന്‍ അവകാശമുണ്ടെന്നായിരുന്നു സര്‍ക്കാര്‍ ഭാഗം വാദം. ഏതൊരു മത വിഭാഗത്തിനും 26-ാം അനുഛേദത്തില്‍ നല്‍കിയിട്ടുള്ള ഭരണാവകാശം പ്രസ്തുത ഭരണം മതവിഭാഗത്തിന്റെ കരങ്ങളില്‍ നിന്നും കവര്‍ന്നെടുക്കുവാനും മറ്റേതെങ്കിലും അധികാര കേന്ദ്രങ്ങളില്‍ ഏല്പിക്കുവാനുമുള്ള അനുമതിയല്ലായെന്നു സുപ്രീം കോടതി അടിവരയിട്ട് ഈ വിധിയില്‍ ഉറപ്പിച്ചു.
1954-ലെ ശിരൂര്‍മഠം കേസ് വിധി പിന്നീടുണ്ടായ എല്ലാ സമാന കേസുകളിലും ആവര്‍ത്തിച്ചുറപ്പിച്ചു. 2017 ലുണ്ടായ കോലഞ്ചേരി പള്ളിക്കേസ് വിധിയും തുടര്‍ന്നുണ്ടായ ശബരിമല കേസ് വിധിയും ശിരൂര്‍ മഠം കേസിന്റെ ചുവടുപിടിച്ചാണുണ്ടായത്.

സുപ്രീം കോടതിവിധി നിയമ സഭകള്‍ക്കു മറികടക്കാമോ?
സുപ്രധാന കോടതി വിധികളെ മറികടക്കുന്നതിനു നിയമസഭകള്‍ നിയമ നിര്‍മ്മാണം നടത്തിയ ചരിത്രവും തുടര്‍ന്നുള്ള കോടതി ഇടപെടലുകളും ഇന്‍ഡ്യയുടെ ഭരണഘടനാ ചരിത്രത്തില്‍ ഗൗരവമായി ചര്‍ച്ച ചെയ്യപ്പെട്ടിട്ടുള്ളതാണ്. അവയില്‍ ഏറ്റവും പ്രധാന വിധി കാവേരി നദി ജലം പങ്കിടുന്നതു സംബന്ധിച്ച തര്‍ക്കങ്ങളിലാണ്.
മറ്റൊരു സമീപകാല സുപ്രധാന കേസ് കേരളത്തില്‍ നി ന്നുള്ളതാണ്. കണ്ണൂര്‍-കരുണാ മെഡിക്കല്‍ കോളജുകളിലെ ഏതാനും വിദ്യാര്‍ത്ഥികളുടെ അഡ്മിഷന്‍  സുപ്രീം കോടതി അസ്ഥിരപ്പെടുത്തി. നിയമാനുസൃതമല്ലാതെ മാനേജ്‌മെന്റ് ക്വോട്ടായില്‍ അഡ്മിഷനെടുത്ത കുട്ടികളുടെ നിയമനമാണ് റദ്ദാക്കിയത്. ‘കുട്ടികളുടെ ഭാവിയെക്കരുതി’ കേരള നിയമസഭ  പ്രത്യേക നിയമം പാസ്സാക്കി. മെഡിക്കല്‍ കൗണ്‍സില്‍ ഈ നിയമനിര്‍മ്മാണം സുപ്രീം കോടതിയില്‍ ചോദ്യം ചെയ്തു. 2018-ലെ സുപ്രധാന സുപ്രീം കോടതി വിധിയില്‍ (AIR 2018 SC 5041) താഴെ പറയുന്ന പ്രകാരം രേഖപ്പെടുത്തി.
”കേരള സംസ്ഥാന ഗവണ്‍മെന്റ് വിവാദ നിയമത്തിലൂടെ കോടതിക്കുള്ള റിവ്യൂ അധികാരത്തിനു സമാനമായ പ്രവൃത്തിയാണ് ചെയ്തിട്ടുള്ളത്. ഇതൊരു ദൗര്‍ഭാഗ്യകരമായ, അനര്‍ത്ഥത്തിലേക്കുള്ള എടുത്തുചാട്ടമാണ്. ഇത്തരത്തിലുള്ള നിയമനിര്‍മ്മാണം ഒട്ടും തന്നെ അനുവദനീയമല്ലെന്നാണു ഞങ്ങളുടെ സുചിന്തിത അഭിപ്രായം. കോടതിവിധിയെ ദുര്‍ബ്ബലപ്പെടുത്തി അസാധുവാക്കിയിരിക്കുന്നു. ഇതൊരു പ്രകടമായ തോന്ന്യാസ നടപടി തന്നെയാണ്. കേരള ഹൈക്കോടതിയുടെ വിധി ഈ കോടതി ഉറപ്പിച്ചതാണ്. ഓണ്‍ലൈന്‍ മുഖേനയാവണം അപേക്ഷകള്‍ സ്വീകരിക്കേണ്ടത് എന്ന വിധിയെയാണു ഇവിടെ അട്ടിമറിച്ചിട്ടുള്ളത്. കോടതി വിധിയെ ദുര്‍ബ്ബലപ്പെടുത്തി അസാധുവാക്കുന്ന പ്രവൃത്തിയാണിത്. ജുഡീഷ്യറിയില്‍ നിക്ഷി
പ്തമായ ജുഡീഷ്യല്‍ അധികാരങ്ങളെ അതിക്രമിച്ച് ഉല്ലംഘിച്ചിരിക്കുന്നു. കേരള ഹൈക്കോടതിയുടെയും ഈ കോടതിയുടെയും വിധികളെയും ഉത്തരവുകളെയും ദുര്‍ബ്ബലപ്പെടുത്തുവാന്‍ സംസ്ഥാന ഗവണ്മെന്റിനു യാതൊരു അവകാശവുമില്ല. നി ലവിലുള്ള നിയമത്തില്‍ ഏതെങ്കിലും അപാകത മാറ്റുന്നതിനുള്ള ഒരു നടപടിയല്ലിത്. ഇക്കാര്യങ്ങള്‍ സംബന്ധിച്ച തര്‍ക്കങ്ങള്‍ വിവിധ ഭരണഘടനാ ബഞ്ച് വിധികളിലൂടെ നിശ്ചിതമായി വ്യവസ്ഥപ്പെടുത്തി ഉറപ്പിച്ചിട്ടുള്ളതാണ്. സംസ്ഥാന ഗവണ്മെന്റ് എന്തുകൊണ്ടാണ് ഇത്തരത്തിലുള്ള ഒരു നിയമനി ര്‍മ്മാണം നടത്തിയത് എന്നതു മനസ്സിലാകുന്നതേയില്ല’.
വ്യക്തിഗത വിധികള്‍ നിയമസഭകള്‍ക്ക് അസ്ഥിരപ്പെടുത്തത്തക്കതല്ലായെന്നും അത്തരത്തിലുള്ള നിയമനിര്‍മ്മാണം നി യമവാഴ്ചയുടെ മരണമണി മുഴക്കുമെന്നും കാവേരി നദിജല കേസില്‍ സുപ്രീം കോടതി വ്യക്തമാക്കി.
സഭ അതിന്റെ അടിസ്ഥാന തത്വങ്ങള്‍ പ്രകാരമാണ് ഭരിക്കപ്പെടേണ്ടണ്ടതെന്നും ഭൂരിപക്ഷത്തിന്റെ അടിസ്ഥാനത്തില്‍ തീരുമാനങ്ങള്‍ കൈക്കാള്ളാവുന്നതല്ലെന്നും 1904-ലെ സ്‌കോട്‌ലണ്ടണ്ട് ഫ്രീ ചര്‍ച്ചു വിധി ഉദ്ധരിച്ച് കോലഞ്ചേരിപ്പപള്ളിക്കേസില്‍, സുപ്രീം കോടതി ചൂണ്ടണ്ടിക്കാട്ടി.

സുപ്രീം കോടതിവിധി രാജ്യത്തെ നിയമം
സുപ്രീം കോടതി വിധി രാജ്യത്തെ നിയമമാണെന്ന (Law Of The Land ) അനുശാസനം ഭരണഘടനയില്‍ എഴുതിച്ചേര്‍ത്തിട്ടുള്ളതിനു പുറമെ, ഇത് എഴുതിപ്പതിഞ്ഞ ഒരു നിയമ തത്ത്വവുമാണ്. 2018-ലെ പിറവം പള്ളിക്കേസ് വിധിയില്‍ സുപ്രീം കോടതി താഴെ പറയുന്ന പ്രകാരം രേഖപ്പെടുത്തി.
”ബന്ധപ്പെട്ട എല്ലാ കോടതികളും അധികാരികളും ഈ വിധിക്കനുസരണമായി പ്രവര്‍ത്തിക്കേണ്ടതാകുന്നു; ഇനി മേലില്‍, ഇക്കാര്യങ്ങളില്‍ കോടതികളില്‍ വ്യവഹാരപ്പെരുപ്പം സൃഷ്ടിച്ചൂകൂടാ.”

എന്താണു സഭാ കേസുകളില്‍ സുപ്രീം കോടതി വിധി?
* 1934-ലെ മലങ്കരസഭാ ഭരണഘടന സാധുവാണ്.
* 1934-ലെ ഭരണഘടന പള്ളികളെ ബന്ധിക്കുന്നതാണ്; സ്ഥായിയായി നിലനില്ക്കുന്നതാണ്.
* മലങ്കരസഭ എപ്പിസ്‌കോപ്പല്‍ സ്വഭാവമുള്ളതാണ്; 1934- ലെ ഭരണഘടനയില്‍ പറഞ്ഞിട്ടുള്ളത്ര എപ്പിസ്‌കോപ്പലാണ്.
* ഇടവകപ്പള്ളികള്‍ക്ക് 2002-ലെ പുതിയ ഭരണഘടന
പോലുള്ള ഭരണരീതി സ്വീകരിക്കാവുന്നതല്ല; ഇത്തരം പ്രവൃത്തികള്‍ ഇന്‍ഡ്യന്‍  ഭരണഘടനയുടെ 25-ഉം 26-ഉം അനുഛേദനങ്ങള്‍ക്കു വിരുദ്ധമാണ്.
* പാത്രിയര്‍ക്കീസിന്റെ ആത്മീയ മേല്‍ക്കോയ്മയുടെ മറവില്‍ പള്ളികളില്‍ സമാന്തര ഭരണ സംവിധാനം ഉണ്ടാക്കാവുന്നതല്ല.
* പൗരസ്ത്യ ഓര്‍ത്തഡോക്‌സ് സുറിയാനി സഭയുടെ പരമാദ്ധ്യക്ഷന്‍ കാതോലിക്കായാണ്; മലങ്കര മെത്രാപ്പോലീത്തായെന്ന നിലയില്‍ ആത്മീയ അധികാരങ്ങളും അദ്ദേഹം വഹിക്കുന്നു.
* മലങ്കര സഭയുടെ ലൗകികവും വൈദികവും ആത്മീയവുമായ ഭരണത്തിന്റെ പ്രധാന ഭാരവാഹിത്വം, 1934-ലെ ഭരണഘടനയില്‍ പറഞ്ഞിട്ടുള്ള വ്യവസ്ഥകള്‍ക്കു വിധേയമായി, മലങ്കര മെത്രാപ്പോലീത്തായ്ക്കുള്ളതാണ്.
* പാത്രിയര്‍ക്കീസിന്റെ ആത്മീയാധികാരം അസ്തമനബി ന്ദുവിലെത്തിയെന്ന കോടതിയുടെ കണ്ടെത്തലിന് സര്‍വ്വശക്തിയും നല്‍കേണ്ടിയിരിക്കുന്നു. ഇതിന്റെ ഫലമായി, പാ ത്രിയര്‍ക്കീസിന് പള്ളികളുടെ ഭരണകാര്യത്തില്‍ ഇടപെടാവുന്നതല്ല; വികാരിമാരെയും വൈദികരെയും ശെമ്മാശന്മാരെയും മേല്‍പട്ടക്കാരെയും നിയമിക്കാവുന്നതല്ല. ഈ നിയമനാധികാരം, 1934-ലെ ഭരണഘടനപ്രകാരം, ബന്ധപ്പെട്ട ഭദ്രാസനങ്ങള്‍, മെത്രാപ്പോലീത്താമാര്‍ തുടങ്ങിയവരില്‍ നിക്ഷി
പ്തമാണ്.
* ഒരു സഭാംഗത്തിനു സഭ വിട്ടു പോകാം. ഏതു സംഘടനയുടെയും അംഗത്വം വേണ്ടെന്ന് വെക്കാനുള്ള അവകാശത്തി
നും ആഗോള മനുഷ്യാവകാശ പ്രഖ്യാപനത്തിന്റെ 20-ാം അനുച്ഛേദത്തിനും അനുസൃതമാണിത്. എന്നാല്‍ ഒരു പള്ളിയുടെ ഇടവകപ്പൊതുയോഗത്തിന് ഭൂരിപക്ഷ തീരുമാനപ്രകാരമോ അല്ലാതെയോ മലങ്കരസഭ വിട്ടുമാറുവാന്‍ തീരുമാനിക്കാവുന്നതല്ല. ഒരിക്കല്‍ ട്രസ്റ്റുണ്ടായാല്‍ അത് എക്കാലവും നിലനി ല്‍ക്കും.
* ഒരു സഭ രൂപീകരിക്കുകയും അത് അതിന്റെ ഗുണഭോക്താക്കളുടെ മെച്ചത്തിനു വേണ്ടിയായിരിക്കുകയും ചെയ്യുമ്പോള്‍, പ്രസ്തുത ഗുണഭോക്താക്കള്‍ക്ക്, ഭൂരിപക്ഷമുണ്ടെങ്കില്‍പ്പോ
ലും, അതിന്റെ സ്വത്തും ഭരണവും കൈപ്പിടിയിലാക്കുവാന്‍ കഴിയുന്നതല്ല. മലങ്കരസഭ ഒരു ട്രസ്റ്റിന്റെ രൂപത്തിലുള്ളതാണ്. ട്രസ്റ്റിലാണ് അതിന്റെ വസ്തുക്കള്‍ നിക്ഷിപ്തമാകുന്നത്. 1934-ലെ ഭരണഘടനപ്രകാരം, ഇടവകാംഗങ്ങള്‍ക്കു ഒറ്റയ്‌ക്കൊറ്റയ്ക്ക് സഭ വിട്ടുപോകാം. എന്നാല്‍ സഭാധികാരികളുടെ അംഗീകാരമില്ലാതെ 1934-ലെ ഭരണഘടനയുടെ പരിധിക്കു വെളിയില്‍ സഭയുടെ സ്ഥാവരജംഗമ സ്വത്തുക്കള്‍ എടുത്തുകൊണ്ടുപോകുവാന്‍ അനുവദിക്കപ്പെട്ടിട്ടില്ല.
* പാത്രിയര്‍ക്കീസിനും കാതോലിക്കായ്ക്കും ബന്ധപ്പെട്ട എല്ലാവര്‍ക്കും ബാധകമായ 1995-ലെ കോടതിവിധിയിലെ ആജ്ഞകള്‍ ലംഘിക്കുന്നതിനാണ് അപ്പീല്‍വാദികള്‍ പാ ത്രിയര്‍ക്കീസിന്റെ ഭൗതികാധികാരങ്ങള്‍ ഉയര്‍ത്തിപ്പിടിച്ചിട്ടുള്ളത് എന്നത് വ്യക്തമാണ്.
* ചരിത്രപശ്ചാത്തലവും പിന്തുടര്‍ന്നുപോന്ന നടപടിക്രമങ്ങളും പ്രകാരം, പാത്രിയര്‍ക്കീസിന്, വികാരിമാര്‍, വൈദികര്‍, ശെമ്മാശന്മാര്‍, മേല്‍പട്ടക്കാര്‍ തുടങ്ങിയവരെ നി യമിക്കാനുള്ള അധികാരം പ്രയോഗിക്കാവുന്നതല്ല. ഇത്തരം അധികാരങ്ങള്‍ സഭയുടെ അധികാരശ്രേണിയിലുള്ള മറ്റ് അധികാരികള്‍ക്കു മാത്രമായി നീക്കിവച്ചിട്ടുള്ളതാണ്. അതുകൊണ്ട് 2002-ലും തുടര്‍ന്നും ചെയ്തതുപോലെ, പള്ളികളില്‍ സമാന്തര ഭരണസംവിധാനം സൃഷ്ടിക്കുന്നതിനാ യി 1934-ലെ ഭരണഘടന ലംഘിച്ചുകൊണ്ട് അധികാരം വിനിയോഗിക്കുന്നതിന് പാത്രിയര്‍ക്കീസിനെ അനുവദിക്കാവുന്നതല്ല.
* ഏകപക്ഷീയമായ, മേല്‍പറഞ്ഞ, പാത്രിയര്‍ക്കീസിന്റെ അധികാരപ്രയോഗങ്ങള്‍ നിയമവിരുദ്ധമാണെന്ന് 1995-ല്‍ ഈ കോടതി വിധിച്ചതാണ്. ഈ വിധിയും ലംഘിച്ചിരിക്കുകയാണ്. ഞങ്ങള്‍ ഈ വിധിന്യായത്തില്‍ വിശദീകരിച്ചിട്ടുള്ളപ്രകാരം, പക്ഷാന്തരമായി മാത്രമാണ്, 1995-ലെ വിധിയില്‍, പാത്രിയര്‍ക്കീസിന് അധികാരമുണ്ടെങ്കില്‍ത്തന്നെ അതു പ്രയോഗിക്കാന്‍ കഴിയുന്നതല്ലായെന്ന തീരുമാനം കൈക്കൊണ്ടത്.
* ഇടവകാംഗങ്ങള്‍ക്ക് പാത്രിയര്‍ക്കീസിന്റെ ആത്മീയ മേലദ്ധ്യക്ഷതയിലും അപ്പോസ്‌തോലിക പിന്തുടര്‍ച്ചയിലും വിശ്വാസമര്‍പ്പിക്കാന്‍ സ്വാതന്ത്ര്യമുണ്ട്. എന്നാല്‍ അത് 1934-ലെ ഭരണഘടന അതിലംഘിച്ച്, വികാരിമാര്‍, വൈദികര്‍, ശെമ്മാശന്മാര്‍, മേല്‍പ്പട്ടക്കാര്‍ തുടങ്ങിയവരുടെ നിയമനങ്ങള്‍ നടത്തുന്നതിനായി ഉപയോഗിക്കുവാന്‍ സാദ്ധ്യമല്ല.
* 1934-ലെ ഭരണഘടനയിലെ വ്യവസ്ഥകള്‍ പാലിച്ചുകൊണ്ട് ഭദ്രാസനങ്ങള്‍ക്ക് എല്ലാ ആഭ്യന്തര കാര്യങ്ങളിലും തീരുമാനം ചെയ്യാനവകാശമുള്ളതും ഭദ്രാസനങ്ങള്‍ക്കായി മെത്രാന്മാരെ തെരഞ്ഞെടുക്കാവുന്നതുമാണ്.
* വികാരിമാരുടെ നിയമനം മതേതര വിഷയമാണ്. 1934-ലെ ഭരണഘടനപ്രകാരം, വികാരിമാര്‍, ശെമ്മാശന്മാര്‍, മെത്രാന്മാര്‍ തുടങ്ങിയവരെ നിയമിക്കുന്നതുമൂലം, ഇന്ത്യന്‍ ഭരണഘടന 25, 26 അനുഛേദങ്ങള്‍ വിഭാവനം ചെയ്യുന്ന ഏതെങ്കിലും അവകാശങ്ങളുടെ ലംഘനം ഉണ്ടാകുന്നില്ല. ആത്മീയ മേലദ്ധ്യക്ഷതയുടെ മറപിടിച്ച് മേല്‍പറഞ്ഞ കാര്യങ്ങളില്‍ ഇടപെടുവാന്‍ പാത്രിയര്‍ക്കീസിന് അധികാരമില്ല. മറിച്ചാകണമെങ്കില്‍ നിയമാനുസൃതം 1934-ലെ ഭരണഘടന ഭേദഗതി ചെയ്യേണ്ടതുണ്ട്. ഈ തത്വം ബന്ധപ്പെട്ടവര്‍ക്കെല്ലാം ബാധകമാണ്.
* വിവിധ തലങ്ങളില്‍ ചുമതലകള്‍ വിഭജിച്ചാണ് സഭയുടെ ഭരണം നടത്തുന്നത്. ഒരു വ്യക്തിക്ക്, അയാള്‍ എത്ര തന്നെ ഉന്നതനായാലും, ഈ ഭരണരീതി കവര്‍ന്നെടുക്കാവുന്നതല്ല. 1934-ലെ ഭരണഘടനയിലുള്ള ചുമതലവിഭജനം സഭയുടെ കാര്യക്ഷമമായ ഭരണത്തിനുവേണ്ടിയാണ്. ഭരണഘടനയിലെ ഇതു സംബന്ധിച്ച നിശ്ചയങ്ങള്‍ സഭ എപ്പിസ്‌കോപ്പല്‍ സ്വഭാവമുള്ളതാണെന്ന അടിസ്ഥാനതത്വത്തിന് എതിരല്ല. അന്ത്യോക്യാ പാത്രിയര്‍ക്കീസിന്റെ ആത്മീയ മേലദ്ധ്യക്ഷത എന്ന സങ്കല്പത്തിന് എതിരായാണ് 1934-ലെ ഭരണഘടന എന്നു വ്യാഖ്യാനിക്കത്തക്കതല്ല. അതേപോലെ, ഇത് ഒരു അനീതി നിറച്ച പ്രമാണ സാമഗ്രിയോ പാത്രിയര്‍ക്കീസിന്റെ ആത്മീയ മേലദ്ധ്യക്ഷതയില്‍ വിശ്വാസമര്‍പ്പിച്ച ഇടവകാംഗങ്ങളെ അടിച്ചമര്‍ത്തുന്നതിനുള്ള ഉപാധിയോ ആകില്ല.
* പള്ളിയും, സെമിത്തേരിയും ആര്‍ക്കും പിടിച്ചെടുക്കാവുന്നതല്ല. പുരാതന ആചാരപ്രകാരം നിലനിന്നുപോന്ന
പോലെ, പ്രസ്തുത അവകാശത്തോടെ, ഇത് ഇടവകാംഗങ്ങളില്‍ നി ലനില്‍ക്കേണ്ടതാണ്. മലങ്കരസഭാ വിശ്വാസത്തില്‍ തുടരുന്നിടത്തോളം, ഒരു ഇടവകാംഗം ഈ അവകാശങ്ങള്‍ അനുഭവിക്കുന്നതിനെ ആര്‍ക്കും നിഷേധിക്കാവുന്നതല്ല. സെമിത്തേരിയില്‍ മാന്യമായി സംസ്‌കരിക്കപ്പെടാനുള്ള അവകാശത്തെ ഹനിക്കാവുന്നതുമല്ല. അതിന്റെ ഉടമകള്‍ തങ്ങളെന്ന് ഭൂരിപക്ഷത്തിന്റെ അടിസ്ഥാനത്തില്‍ പോലും ആര്‍ക്കും അവകാശവാദം ഉയര്‍ത്താവുന്നതല്ല. ഭൂരിപക്ഷത്തിനും ഇതു സാദ്ധ്യമല്ല; ആര്‍ക്കും പള്ളിയോ സ്വത്തുക്കളോ കയ്യേറാവുന്നതുമല്ല.
* സഭയുടെ സ്വാഭാവിക പൊതുവിശ്വാസം യേശുക്രിസ്തുവിലാണ്. ഇത് കാതോലിക്കോസിന്റെയും പാത്രിയര്‍ക്കീസിന്റെയും അധികാരത്തിന്റെ പേരില്‍, അനാവശ്യമായി വിഭജിക്കാന്‍ ശ്രമിക്കുകയാണ്. ഭരണവും മറ്റ് അധികാരങ്ങളും പി ടിച്ചെടുക്കുവാന്‍ യഥാര്‍ത്ഥത്തില്‍ ഒരു ശ്രമം നടത്തി വരുന്നു. ഇതിനായി, ആദ്ധ്യാത്മികതയുടെ മറവില്‍, ഭൗതികമായ കാര്യങ്ങളില്‍ ആധിപത്യം ഉറപ്പിക്കുവാന്‍ പാത്രിയര്‍ക്കീസിന്റെയും കാതോലിക്കോസിന്റെയും മേലദ്ധ്യക്ഷത സംബന്ധിച്ച് തര്‍ക്കങ്ങള്‍ ഉണ്ടാക്കുകയാണ്. ഈ തര്‍ക്കങ്ങള്‍ക്ക് എന്തെങ്കിലും നല്ലതോ യഥാര്‍ത്ഥമോ ആയ കാരണങ്ങളില്ല.
* പാത്രിയര്‍ക്കീസിന്റെ അധികാരം പള്ളിയുടെ ഭൗതിക ഭരണകാര്യങ്ങളിലേക്ക് ഒരിക്കലും വ്യാപരിച്ചിട്ടില്ല. 1995-ലെ വിധി
ന്യായത്തെ ലംഘിച്ച് പള്ളിക്കാര്യങ്ങളില്‍, പാത്രിയര്‍ക്കീസ് നടത്തിയ അനര്‍ഹമായ ഇടപെടലുകളെയും പ്രവൃത്തികളെ
യും ചോദ്യം ചെയ്യുന്നതിലൂടെ പാത്രിയര്‍ക്കീസിന്റെ ആത്മീയ പരമാധികാരത്തെ കാതോലിക്കോസ് വിഭാഗം നിഷേധിക്കുന്നു വെന്നു പറയാനാവില്ല. 1995-ലെ വിധിക്ക് ശേഷം സൃഷ്ടിക്കപ്പെട്ട അവസ്ഥയ്ക്ക് പാത്രിയര്‍ക്കീസ് വിഭാഗത്തെ കുറ്റപ്പെടുത്തേണ്ടിയിരിക്കുന്നു. പള്ളിയുടെ സ്വത്തുക്കള്‍ 1934-ലെ ഭരണഘടനപ്രകാരം ഭരിക്കപ്പെടേണ്ടതാണ്. ബന്ധപ്പെട്ട എല്ലാവര്‍ക്കും ബാധകമായ 1995-ലെ വിധിയെ പാത്രിയര്‍ക്കീസ് വിഭാഗം ബഹുമാനിച്ചിട്ടില്ല. ഹൈക്കോടതിയില്‍, കാതോലിക്കാപക്ഷം റിട്ട് ഹര്‍ജികള്‍ ഫയല്‍ ചെയ്തത് പാത്രിയര്‍ക്കീസും (അദ്ദേഹത്തിന്റെ അനുയായികളും) 1995-ലെ വിധി ലംഘിച്ച് വികാരി മുതലായവരെ നിയമിക്കുന്നത് തടയുന്നതിനു വേണ്ടിയായിരുന്നു.
* 1934-ലെ ഭരണഘടന ഇപ്പോള്‍ നടപ്പിലാക്കുകയാണു വേണ്ടത്. അതിനെതിരെയുള്ള തര്‍ക്കങ്ങളും തടസ്സങ്ങളും
പാത്രിയര്‍ക്കീസ് വിഭാഗത്തിന് ഉയര്‍ത്താവുന്ന തരത്തിലുള്ളവയല്ല. മലങ്കരസഭയുള്ളിടത്തോളം, സ്വത്തുക്കള്‍ സഹിതം, തനിമയോടെ ഒന്നാകെയാണു സഭ നിലനില്‍ക്കേണ്ടത്. ഒരു ഗ്രൂപ്പിനോ ഘടകത്തിനോ, ഭൂരിപക്ഷപ്രകാരമോ അല്ലാതെയോ സ്വത്തുക്കളോ ഭരണമോ കൈക്കലാക്കുവാന്‍ സാദ്ധ്യമല്ല. എന്തുകൊണ്ടെന്നാല്‍, അത് സഭയുടെ ഭരണകാര്യങ്ങളിലെ തികച്ചും നിയമവിരുദ്ധമായ കൈകടത്തലാകും; വസ്തുക്കളിന്മേല്‍ കയ്യൂക്കുകൊണ്ടുള്ള കയ്യേറ്റമാകും. സഭയുടെ സ്വഭാവത്തിനോ അതിന്റെ വസ്തുക്കള്‍ക്കോ ഭരണത്തിനോ മാറ്റം വരുത്തുവാന്‍ ഗുണഭോക്താക്കള്‍ക്ക്, ഭൂരിപക്ഷമുണ്ടെങ്കില്‍ പോലും, സാധിക്കുന്നതല്ല. നിയമാനുസൃതം 1934-ലെ ഭരണഘടന ഭേദഗതി ചെയ്യുക മാത്രമാണ് ഭരണക്രമം മാറ്റുവാനുള്ള ഏക ഉപാധി. 1934-ലെ ഭരണഘടനയുടെ വ്യവസ്ഥകള്‍ക്കു വിരുദ്ധമായി ഇടവകപ്പള്ളികള്‍ക്ക് ബൈലോകള്‍ പോലും ഉണ്ടാക്കത്തക്കതല്ല.
* 1934-ലെ ഭരണഘടന, മലങ്കരസഭയുടെ വസ്തുക്കളില്‍, നിലവിലോ ഭാവിയിലോ ഉള്ള സ്ഥാപിതമോ വ്യവസ്ഥകള്‍ക്ക് വിധേയമായതോ ആയ, അവകാശമോ ഉടമസ്ഥതയോ താല്‍പര്യമോ, സൃഷ്ടിക്കുകയോ പ്രഖ്യാ
പിക്കുകയോ കൈമാറുകയോ പരിമിതപ്പെടുത്തുകയോ ഇല്ലാതാക്കുകയോ ചെയ്യുന്നില്ല; ഒരു ഭരണസംവിധാനമുണ്ടാക്കുക മാത്രമാണ് ചെയ്യുന്നത്. അതുകൊണ്ടു തന്നെ ഈ ഭരണഘടന രജിസ്റ്റര്‍ ചെയ്യേണ്ട ആവശ്യമില്ല. ഉടമ്പടികള്‍ രജിസ്റ്റര്‍ ചെയ്തതാണ് എന്നവകാശപ്പെടുന്നതുകൊണ്ടു മാത്രം, ഏതു നിലയിലും, മേല്‍പറഞ്ഞ കാരണങ്ങളാല്‍, 1934-ലെ ഭരണഘടനയെ ഉടമ്പടികള്‍ മറികടക്കുന്നതല്ല.
* അടിസ്ഥാനപരമായി എപ്പിസ്‌കോപ്പലായ ഈ സഭയില്‍ പള്ളികള്‍ക്ക് എത്രത്തോളം സ്വയംഭരണം ഭരണഘടന നല്‍ കിയിട്ടുണ്ടോ, അത് 22-ാം വകുപ്പില്‍ പറയുന്ന ഭരണത്തി
നും അത്യാവശ്യ ചെലവുകള്‍ക്കും വേണ്ടിയാണ്.
* 2002-ലെ ഭരണഘടനയുടെ രൂപീകരണം നിയമവിരുദ്ധവും അസാധുവുമായ നടപടികളുടെ ഫലമായുള്ളതാണ്. അത് അംഗീകരിക്കാനാവില്ല. മലങ്കരസഭയിലെ പള്ളികളുടെ സമാന്തര ഭരണത്തിനുള്ള സംവിധാനമായി അതിനെ കണക്കാക്കാനുമാവില്ല. 1934-ലെ ഭരണഘടനപ്രകാരമാണ് പള്ളികളിലെ ഭരണം നടത്തേണ്ടത്.
* 1934-ലെ ഭരണഘടന ഇടവകപ്പള്ളികളുടെ ഭരണത്തിനനുയോജ്യവും മതിയായതുമാണ്. അതിനാല്‍ സിവിള്‍ നടപടി നിയമം 92-ാം വകുപ്പുപ്രകാരം ഒരു സ്‌കീം (ഭരണസംവിധാനം) രൂപീകരിക്കേണ്ട ആവശ്യമില്ല.
* രണ്ടു വിഭാഗങ്ങളും തമ്മില്‍ ഭിന്നത നിലനില്‍ക്കുന്നതിനാലും രണ്ടു വിഭാഗങ്ങള്‍ തമ്മിലുള്ള ഒത്തുതീര്‍പ്പി
നുള്ള സാദ്ധ്യത വളരെ വിരളമായതിനാലും, ഓരോ വിശ്വാസത്തിലും നില്‍ക്കുന്ന ഓരോ വികാരിമാരെ, ശുശ്രൂഷകള്‍ നടത്താന്‍ അനുവദിക്കണമെന്ന അപേക്ഷ അംഗീകരിക്കത്തക്കതല്ല; കാരണം, ഇത് സമാന്തര ഭരണസംവിധാനത്തിന് പരിപോഷണം നല്‍കുന്നതാകും.

കേരള നിയമസഭയിലൂടെ നിയമ നിര്‍മ്മാണം നടത്തിക്കിട്ടണമെന്ന ആവശ്യം ഉന്നയിക്കുന്നവര്‍ക്കും അതി
നായി നിലകൊള്ളുന്നുവെന്ന പ്രഖ്യാപനം നടത്തുന്ന വര്‍ക്കും ഒരു കാര്യം ഉറപ്പാണ് – ഈ ആവശ്യം ഭരണഘട
നാനുസൃതമല്ല. ആര് ഇക്കാര്യം ചോദ്യം ചെയ്ത് കോടതിയെ സമീപിച്ചാലും, ഉണ്ടാക്കിയെടുത്തേക്കാവുന്ന
നിയമം കോടതി അസ്ഥിരപ്പെടുത്തും.
ഇപ്പോള്‍ നിയമ നിര്‍മ്മാണത്തെപ്പറ്റി ഉയര്‍ത്തുന്ന
പാഴ്‌മൊഴികള്‍ ദുരുദേശ്യത്തോടെയാണ്. ഒരു വിഭാഗം സഭാംഗങ്ങളുടെ ‘കണ്ണില്‍ പൊടിയിടല്‍’ മാത്രമാണ് ഇവരുടെ ലക്ഷ്യം.