രണ്ട് ദിവസത്തെ ആശങ്കകൾക്കു വിരാമമിട്ട് മലമ്പുഴയിലെ ചെറാട് മലയിൽ കുടുങ്ങിയ ബാബുവിനെ സുരക്ഷിത സ്ഥാനത്ത് എത്തിക്കാൻ നമ്മുടെ ഭാരത സേനക്ക് സാധിച്ചു. രക്ഷാപ്രവർത്തനത്തില്‍ ഏര്‍പ്പെട്ട ഇന്ത്യന്‍ ആര്‍മി, കോസ്റ്റ് ഗാർഡ്, കേരള പോലീസ്, ഫയർ & റസ്ക്യൂ, എന്‍ ഡി ആര്‍ എഫ്, വനം വകുപ്പ്, ജില്ലാ ഭരണസംവിധാനം, മെഡിക്കല്‍ സംഘം, ജനപ്രതിനിധികൾ, നാട്ടുകാർ എന്നിവരോട് മലങ്കര ഓര്‍ത്തഡോക്സ് സഭയുടെ ആദരവ് അറിയിക്കുന്നു.
സംസ്ഥാന സര്‍ക്കാര്‍ വിദ്യാര്‍ത്ഥികളിലെ മികച്ച ആശയങ്ങളെയും സംരഭകരെയും പ്രോത്സാഹിപ്പിക്കുന്നതിനു വേണ്ടി സംഘടിപ്പിച്ച യങ്ങ് ഇന്നോവേറ്റേഴ്‌സ് പ്രോത്സാഹിപ്പിക്കുന്നതിനു വേണ്ടി സംഘടിപ്പിച്ച യങ്ങ് ഇന്നോവേറ്റേഴ്‌സ് പ്രോഗ്രാമില്‍ സംസ്ഥാനത്തെ മികച്ച ആശയങ്ങളിലൊന്നായി കുട്ടിക്കാനം മാര്‍ ബസേലിയോസ് കോളേജിലെ വിദ്യാര്‍ത്ഥികള്‍ സമര്‍പ്പിച്ച പ്രൊജക്റ്റ് തെരഞ്ഞെടുക്കപ്പെട്ടു.
അയ്യായിരത്തോളം പ്രൊജക്റ്റുകളില്‍ നിന്നായി സംസ്ഥാന തലത്തില്‍ തെരഞ്ഞെടുക്കപ്പെട്ട 96 ആശയങ്ങളിലൊന്നാണിത്. സംസ്ഥാന തലത്തില്‍ തെരഞ്ഞെടുക്കപ്പെടുന്ന പ്രൊജക്റ്റുകള്‍ക്ക് ആവശ്യമാകുന്ന വിദ്ഗദ്ധ സാങ്കേതിക സഹായവും സാമ്പത്തിക സഹായവും സര്‍ക്കാര്‍ നല്‍കും. മെക്കാനിക്കല്‍ വിഭാഗം മേധാവി പ്രൊഫ. മണികണ്ഠന്റെ നേതൃത്വത്തില്‍ വിദ്യാര്‍ത്ഥികളായ ജസ്റ്റിന്‍ ഈപ്പന്‍ ജോര്‍ജ്, സിറില്‍ സി. തോമസ് എന്നിവരാണ് പ്രൊജക്റ്റ് സമര്‍പ്പിച്ചത്.
ഇന്ത്യയുടെ വാനമ്പാടി പറന്നകന്നു. 35-ലേറെ ഇന്ത്യന്‍-വിദേശ ഭാഷകളിലായി 30,000-ത്തിലധികം ഗാനങ്ങള്‍ ആലപിച്ചു. ഇന്ത്യന്‍ ജനതയെ സംഗീതത്തില്‍ ലയിപ്പിച്ച അതുല്യപ്രതിഭ. അവരുടെ പാട്ടുകള്‍ കേട്ട് വളര്‍ന്ന തലമുറകള്‍ക്ക് വികാരനിര്‍ഭരമായ നിമിഷമാണിത്. തളര്‍ന്ന മനസുകളെ ആശ്വാസത്തിന്‍റെയും ആനന്ദത്തിന്‍റെയും ലോകത്തേക്ക് കൈപിടിച്ചു നയിച്ച സംഗീതപ്രതിഭ. ഇന്ത്യന്‍ ജനതയുടെ മനസില്‍ അലിഞ്ഞുചേര്‍ന്ന ആ സ്വര്‍ഗ്ഗീയനാദം ഈശ്വരചൈതന്യം നിറഞ്ഞവയായിരുന്നു. സംഗീതലോകത്തെ മഹാപ്രതിഭയുടെ വിയോഗ ദുഃഖത്തില്‍ മലങ്കര ഓര്‍ത്തഡോക്സ് സഭയും പങ്കു ചേരുന്നു. ആദരവോടെ ആദരാജ്ഞലികള്‍ സമര്‍പ്പിക്കുന്നു.
ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവ
ആതുര സേവന രംഗത്ത് മികവു പുലർത്തുന്നവർക്ക് കൈരളി ടി.വി. നൽകുന്ന ‘നേഴ്സ് ഓഫ് ദ ഇയർ’ അവാർഡിന് ദുബായ് സെന്‍റ് തോമസ് കത്തീഡ്രല്‍ യുവജനപ്രസ്ഥാനം വൈസ് പ്രസിഡന്‍റ് ശ്രീ. ബിബിൻ എബ്രഹാം അർഹനായി. ബഹുമാനപ്പെട്ട കേരള മുഖ്യമന്ത്രി ശ്രീ. പിണറായി വിജയനിൽ നിന്ന് അവാർഡും, മലയാളത്തിന്‍റെ മഹാനടൻ പത്മശ്രീ മമ്മൂട്ടിയിൽ നിന്ന് ഗോൾഡ് മെഡലും ഏറ്റുവാങ്ങി.
കോവിഡ് കാലത്ത് ഒരു കൂട്ടം പ്രവാസികളെ സംഘടിപ്പിച്ച് വാട്സ് ആപ്പ് ഗ്രൂപ്പ് രൂപീകരിച്ച് പരസ്പരം ആശ്വസിപ്പിച്ചും, സഹായിച്ചും പ്രവര്‍ത്തനങ്ങള്‍ക്ക് നേതൃത്വം നല്‍കി. പണമില്ലാത്ത രോഗികള്‍ക്ക് മരുന്നുകള്‍ എത്തിച്ചു നല്‍കിയും, നാട്ടിലേക്ക് വരാന്‍ പണമില്ലാതെ ദുരിതം അനുഭവിച്ചവരെ സഹായിക്കുകയും, അവരെ നാട്ടിലെത്തിക്കുകയും ചെയ്തു. ആതുരസേവന രംഗത്ത് ആത്മാർത്ഥതയോടെ ചെയ്ത കഠിനാധ്വാനങ്ങളുടെ അംഗീകാരമാണ് ഈ അവാർഡ്. കോട്ടയം കാരാട്ടുകുന്നേല്‍ സെന്‍റ് മേരീസ് ഓര്‍ത്തഡോക്സ് പള്ളിയാണ് മാതൃ ഇടവക. ദുബായ് ഹെൽത്ത്‌ അതോറിറ്റിയിൽ ഇപ്പോള്‍ ജോലി ചെയ്യുന്നു. ഭാര്യ: ജിന്‍സി വി. എബ്രഹാം, മക്കള്‍: ഹെയ്ഡന്‍, ഹന്ന
കോട്ടയം: കുറിഞ്ഞി സെന്‍റ് പീറ്റേഴ്സ് ആന്‍റ് സെന്‍റ് പോള്‍സ് പള്ളിയെ സംബന്ധിച്ച് ഉണ്ടായ ബഹു. സുപ്രീം കോടതി വിധി വളച്ചൊടിക്കുന്നത് നിര്‍ഭാഗ്യകരമെന്ന് മലങ്കര ഓര്‍ത്തഡോക്സ് സഭ അസ്സോസിയേഷന്‍ സെക്രട്ടറി അഡ്വ. ബിജു ഉമ്മന്‍. 1934-ലെ ഭരണഘടന അനുസരിച്ച് പള്ളി ഭരിക്കപ്പെടണമെന്നുള്ള ഹൈക്കോടതി വിധിയല്ല അസ്ഥിരപ്പെടുത്തിയിരിക്കുന്നത്. ആ ഇടവകയില്‍ മൂന്ന് കുടുംബക്കാര്‍ക്ക് മാത്രമായി നിലനില്‍ക്കുന്ന പ്രത്യേകമായ അവകാശങ്ങള്‍ സംരക്ഷിച്ചു കിട്ടുന്നതിലേക്കാണ് ആ കുടുംബക്കാര്‍ സുപ്രീം കോടതിയെ സമീപിച്ചത്. ഇക്കാര്യത്തില്‍ അവരുടെ വാദം വീണ്ടും കേട്ട് ഹൈക്കോടതി തീരുമാനം കൈക്കൊള്ളുവാനാണ് ബഹു. സുപ്രീം കോടതി ഇപ്പോള്‍ ആവശ്യപ്പെട്ടിരിക്കുന്നത്. 2015-ല്‍ ഉണ്ടായ ഹൈക്കോടതി വിധി സംബന്ധിച്ചാണ് ഇപ്പോള്‍ സുപ്രീം കോടതി ഉത്തരവ്. എന്നാല്‍ 2017 ജൂലൈ 3-ന് ബഹു. സുപ്രീം കോടതി ഭരണഘടനയുടെ സാധുത സംബന്ധിച്ച് അത് എല്ലാ പള്ളികള്‍ക്കും ബാധകമാണെന്ന് അസന്നിഗ്ദമായി പ്രസ്താവിച്ചിട്ടുള്ളതുമാണ്. ഈ സാഹചര്യത്തില്‍ തെറ്റിദ്ധാരണ പരത്തുന്ന വാര്‍ത്തകളില്‍ നിന്നും പിന്തിരിയണമെന്ന് അദ്ദേഹം പറഞ്ഞു.
കോട്ടയം: കോതമംഗലം പള്ളിക്കേസിനു ഒരു അവസാനം വേണമെന്നും, സുപ്രീം കോടതി വിധി നടപ്പാക്കാൻ സ്വീകരിക്കുന്ന നടപടികളെ സംബന്ധിച്ച് മൂന്ന് ആഴ്ചക്കകം വിശദമായ റിപ്പോർട്ട്‌ സമർപ്പിക്കുവാനും ഹൈക്കോടതി കേരള സർക്കാരിനു നിർദ്ദേശം നൽകിയത് സ്വാഗതാര്‍ഹമാണെന്ന് മലങ്കര ഓര്‍ത്തഡോക്സ് സഭ എപ്പിസ്കോപ്പല്‍ സുന്നഹദോസ് സെക്രട്ടറി അഭിവന്ദ്യ ഡോ. യൂഹാനോന്‍ മാര്‍ ദീയസ്കോറോസ് മെത്രാപ്പോലീത്ത. വിധി നടപ്പിലാക്കുന്നതിലൂടെ ആരേയും പുറത്താക്കുവാന്‍ സഭ ആഗ്രഹിക്കുന്നില്ല. കോടതിയുടെ നിര്‍ദ്ദേശങ്ങളെ സര്‍വ്വാത്മനാ സ്വീകരിച്ച് എല്ലാ വിശ്വാസികളും ഒരു ആരാധനാ സമൂഹമായി ഒരുമിച്ച് നിലകൊണ്ട് ഇടവകയുടെ പ്രവര്‍ത്തനങ്ങള്‍ ഭരണാഘടനാസൃതമായി മുമ്പോട്ടു കൊണ്ടുപോകുവാന്‍ തയ്യാറാകണം. ഒരു വിഭാഗത്തെ പുറത്താക്കി ദേവാലയം പിടിച്ചെടുക്കുന്നു എന്നത് ദുഷ്പ്രചരണം മാത്രമാണ്. വിധി നടപ്പിലാക്കുവാന്‍ കേരള സര്‍ക്കാര്‍ സര്‍വ്വാത്മനാ പിന്തുണ നല്‍കുമെന്ന് പ്രത്യാശിക്കുന്നതായി അദ്ദേഹം പറഞ്ഞു.
പരിശുദ്ധ കാതോലിക്കാബാവാ തിരുമേനിയുടെ പൊതുപരിപാടികള്‍ റദ്ദാക്കുന്നു
കോട്ടയം: കോവിഡ് മഹാമാരിയുടെ തീവ്രവ്യാപനത്തിന്‍റെ പശ്ചാത്തലത്തിലും, ഫെബ്രുവരി 25-ന് നടക്കുന്ന മലങ്കര സുറിയാനി ക്രിസ്ത്യാനി അസ്സോസിയേഷന്‍റെ ദൈവീകവും വിജയകരവുമായ
നടത്തിപ്പിനുവേണ്ടി പ്രത്യേകം ധ്യാനനിരതനാകുന്നതിനു വേണ്ടിയും പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവാ തിരുമേനി ഈ മാസം അവസാനം വരെ അതിപ്രധാനവും അത്യാവശ്യവുമായ പരിപാടികള്‍ ഒഴികെ മറ്റ് പൊതുപരിപാടികളെല്ലാം റദ്ദു ചെയ്യുന്നതായി അറിയിച്ചു. സുപ്രധാനവും അത്യാവശ്യവുമായ കൂടിക്കാഴ്ചകള്‍ മാത്രം അനുവദിക്കുന്നതായിരിക്കും.
മാര്‍ച്ച് 1 മുതല്‍; ചൊവ്വാ, ബുധന്‍, വ്യാഴം, വെള്ളി എന്നീ ദിവസങ്ങളില്‍ രാവിലെ 10 മണി മുതല്‍ 1 മണി വരെ ദേവലോകം ഓഫീസില്‍ ഉണ്ടായിരിക്കും. ചൊവ്വാ, ബുധന്‍, വ്യാഴം എന്നീ ദിവസങ്ങളില്‍ ഉച്ചകഴിഞ്ഞ് 3 മുതല്‍ 5 വരെ സന്ദര്‍ശകരെ സ്വീകരിക്കുന്നതാണ്. നേരത്തേ ഓഫീസില്‍ നിന്നും സന്ദര്‍ശനാനുമതി ലഭിച്ചവരെ മാത്രമേ സ്വീകരിക്കുകയുള്ളു. ദേവാലയ കൂദാശകള്‍ ഒഴികെ പെരുന്നാളുകള്‍ പോലുള്ള മറ്റു പൊതുപരിപാടികളില്‍ ഒരു നേരം മാത്രമേ പരിശുദ്ധ പിതാവിന്‍റെ സാന്നിധ്യം ഉണ്ടായിരിക്കുകയുള്ളൂ. നേരത്തേ തന്നെ അനുമതി വാങ്ങിയിട്ടുള്ള പരിപാടികള്‍ക്ക് ഈ നിബന്ധനകള്‍ ബാധകമായിരിക്കുകയില്ല എങ്കിലും ഒരു നേരം മാത്രം സംബന്ധിക്കുന്ന തീരുമാനത്തിന് വ്യത്യാസമുണ്ടാവുകയില്ല എന്നും പരിശുദ്ധ പിതാവ് അറിയിച്ചു. കാര്യങ്ങളുടെ ഗൗരവം മനസിലാക്കി എല്ലാവരും സഹകരിക്കണമെന്ന് അഭ്യര്‍ത്ഥിക്കുന്നു.
ഫാ. ഡോ. ജോണ്‍സ് എബ്രഹാം കോനാട്ട്
പ്രിന്‍സിപ്പല്‍ സെക്രട്ടറി
കോട്ടയം: കാരാപ്പുഴ തെക്കുംഗോപുരം ലക്ഷ്മിക്ക് സഹായഹസ്തവുമായി മലങ്കര ഓര്‍ത്തഡോക്സ് സഭയുടെ പരമാദ്ധ്യക്ഷന്‍ പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവ. കോട്ടയം വാകത്താനത്ത് ഓര്‍ത്തഡോക്സ് സഭയുടെ പേരില്‍ ലഭിക്കുന്ന വസ്തുവില്‍ ഭവനം നിര്‍മ്മിക്കുവാന്‍ സഭ ആഗ്രഹിക്കുന്നു. എന്നാല്‍ കോട്ടയം കാരാപ്പുഴ പ്രദേശത്തു തന്നെ ലക്ഷ്മിക്ക് സൗകര്യപ്രദമായി മൂന്ന് സെന്‍റ് സ്ഥലം ആരെങ്കിലും നല്‍കുകയാണെങ്കില്‍ ഭവനം പൂര്‍ണ്ണമായും നിര്‍മ്മിച്ചു നല്‍കുവാന്‍ സഭ തയ്യാറാണെന്ന് പരിശുദ്ധ ബാവാ അറിയിച്ചു. ഇന്ന് മനോരമയില്‍ പ്രസിദ്ധീകരിച്ച വാര്‍ത്തയുടെ പശ്ചാത്തലത്തിലാണ് ലക്ഷ്മിയുടെ ദുരിതപൂര്‍ണ്ണമായ സാഹചര്യത്തോട് പരിശുദ്ധ ബാവാ പ്രതികരിച്ചത്. ലക്ഷ്മിയുടെ ജീവിത സാഹചര്യം നേരിട്ട് കണ്ട് മനസിലാക്കുന്നതിനായി ഓഫീസ് ചുമതല വഹിക്കുന്ന വൈദികരെ ബാവാതിരുമേനി ചുമതലപ്പെടുത്തുകയും ചെയ്തു.
കോട്ടയം: മലങ്കര ഓര്‍ത്തഡോക്സ് സുറിയാനി സഭയുടെ മാനേജിംഗ് കമ്മറ്റി യോഗം 2022 ഫെബ്രുവരി 11-ന് സൂം വീഡിയോ കോണ്‍ഫറന്‍സിംഗ് മുഖേന ഓണ്‍ലൈനായി ചേരുവാനുള്ള ക്രമീകരണങ്ങള്‍ ഏര്‍പ്പെടുത്തി പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവാ തിരുമേനി കല്‍പന പുറപ്പെടുവിച്ചു. യോഗത്തിന്‍റെ പ്രധാന അ‍ജണ്ടയായ മെത്രാപ്പോലീത്ത സ്ഥാനാര്‍ത്ഥികളുടെ തിരഞ്ഞെടുപ്പും ഓണ്‍ലൈന്‍ വോട്ടിംഗിലൂടെ നടത്തും. പീരുമേട് മാര്‍ ബസേലിയോസ് എഞ്ചിനീയറിംഗ് കോളേജ് അഡ്മിനിസ്ട്രേറ്റര്‍ ശ്രീ. പ്രിന്‍സ് വര്‍ഗീസ് തിരഞ്ഞെടുപ്പിന്‍റെ മുഖ്യ വരണാധികാരി ആയിരിക്കും. സ്ക്രീനിംഗ് കമ്മറ്റി പരിശുദ്ധ ബാവാ തിരുമേനിക്ക് സമര്‍പ്പിച്ച 14 സ്ഥാനാര്‍ത്ഥികളുടെ പട്ടികയില്‍ നിന്നും 11 പേരെ മാനേജിംഗ് കമ്മറ്റി തിരഞ്ഞെടുത്ത്, ഫെബ്രുവരി 25-ന് നടക്കുന്ന മലങ്കര സുറിയാനി ക്രിസ്ത്യാനി അസ്സോസിയേഷനിലേക്ക് സമര്‍പ്പിക്കും.
കോവിഡ് വ്യാപനത്തിന്റെ പശ്ചാത്തലത്തില്‍ സര്‍ക്കാര്‍ ഏര്‍പ്പെടുത്തുന്ന എല്ലാ പ്രതിരോധ പ്രവര്‍ത്തനങ്ങള്‍ക്കും സഭയുടെ പൂര്‍ണ്ണമായ സഹകരണം ഉണ്ടാകുമെന്നും എന്നാല്‍ ഞായറാഴ്ച ആരാധനയില്‍ വിശ്വാസികള്‍ക്ക് ആര്‍ക്കും പങ്കെടുക്കുവാന്‍ കഴിയാത്ത സ്ഥിതിക്ക് ഇളവു നല്‍കണമെന്നും പ. ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവാ പറഞ്ഞു. പ്രതിസന്ധികളുടെയും മാനസിക ക്ലേശങ്ങളുടെയും നടുവില്‍ വിശ്വാസികളുടെ ആശ്രയം ആരാധനയും പ്രാര്‍ത്ഥനയുമാണ്. ചരിത്രപ്രസിദ്ധമായ മാരാമണ്‍ കണ്‍വന്‍ഷന്‍, മാക്കാംകുന്ന് കണ്‍വന്‍ഷന്‍ തുടങ്ങി നിരവധി ശുശ്രൂഷകള്‍ വിശ്വാസ സമൂഹത്തില്‍ സമാധാനവും പ്രതീക്ഷയും നല്‍കുന്നവയാണ്. നോമ്പിന്റെയും വ്രതത്തിന്റെയും നാളുകളും സമീപിക്കുന്നു. ഈ സാഹചര്യത്തില്‍, സര്‍ക്കാരിന്റെ അടിയന്തിര ശ്രദ്ധ ഉണ്ടാവണമെന്ന് അദ്ദേഹം ആവശ്യപ്പെട്ടു.
